DILI, STLTIMORLESTE.com – Bankada Partidu Kongresu Nasional Rekunstrusaun Timor (CNRT) iha Parlamentu Nasional manifesta sentidu solidariedade ba familia no estrutura Partidu FRETILIN neebe lakon ona Francisco Guterres Lu-Olo.
Eis Prezidente Republika Francisco Guterres “Lu-Olo” hakotu iis iha loron Domingu kalan (21/06) iha Hospital Prince Court, iha Kuala Lumpur, Malazia, hafoin halao tratamentu saude intensivu.
Xefe Bankada Partidu CNRT, Deputadu Patrocinio Fernandes hatete, nasaun tomak hasoru hela situasaun tristeja boot ida tanba lakon lider figura estadu nian eis Prezidente Republika no eis Prezidente Parlamentu Nasional nomos Prezidente asembleia Konstituente.
Tan nee, Deputadu Patrocinio lori militante no estrutura Partidu CNRT nia naran hatoo sentidu kondolensia ba familia saudozu no estrutura Partidu FRETILIN iha teritoriu laran, tanba lakon ona ema neebe sira hadomi.
“Maibe nuudar bankada ida iha Parlamentu Nasional, ami lori bankada nia naran, lori kuadru estrutura militante Partidu CNRT iha teritoriu Timor laran tomak hatoo ami nia profunda sentidu kondolensia ba familia saudozu no familia boot Partidu FRETILIN,” hatete nia ba jornalista sira iha Parlamentu Nasional, Segunda (22/06/2026)
Nia hatutan, Timor oan lakon ona figura boot ida iha nasaun nee, tanba Francisco Guterres Lu-Olo hanesan figura boot ida neebe tinan barak dedika nia aan servi estadu ida nee.
Tan nee nia husu Timor oan hotu-hotu iha teritoriu laran inklui iha estranjeiru atu partila sentimentu tristeja ida momentu difisil ida nee.
“Ami nia mensajen mak nee, husu joven hotu-hotu iha teritoriu laran, ita hotu iha obrigasaun tu partilha ita nia tristeja iha situasaun ida nee,”
Sorin seluk, Xefe Bankada Partidu KHUNTO, Deputadu Antonio Verdial lori estrutura Bankada Partidu KHUNTO husi Nasional too iha baze hatoo sentidu kondolensia ba famila saudozu no estrutura Partidu FRETILIN.
Nia dehan, Timor Leste figura importante ida tanba lakon Francisco Guterres Lu-Olo hanesan figura ida neebe mak importante ba nasaun republika Demokratika Timor Leste.
“Ho falisimentu sua exelensia Franciso Guterres nee Timor Leste lakon figura boot ida ba nasaun nee,” dehan deputadu Antonio Verdial.
Nia dehan, iha ambitu kopa mundial nee ema hotu-hotu asiste kopa mundial maibe nia husu Timor oan hotu-hotu atu asiste ho hakmatek no evita halo konvoiu iha kapital Dili no mos munisipiu sira.
“Husu Timor oan hotu atu ita hotu hakmatek no fo tempu halo orasaun husu ba Nai Maromak atu haraik fatin neebe hakmatek iha Aman Maromak nia kadunan santo,” dehan nia.
Entretantu Francisco Guterres “Lu-Olo”, Moris iha Ossu, Distrito Viqueque, iha 7 Setembru 1954.
Lu-Olo kaben ho Cidália Lopes Nobre Mouzinho Guterres, no sira iha oan nain-haat, Francisco Cidalino, Eldino Nobre, Felezito Samora Guterres no Dália Luliana Nobre Guterres.
(alb)
