DILI, STLTIMORLESTE.com – Povu Timor Leste (TL) tanis tanba lakon Eis Prezidente Republika atual Presidente Partidu FRETILIN, Francisco Guterres Lu Olo, neebe fila ona ba aman Maromak iha loron 21 Junhu 2026. Notisias nee lori tristeza boot ba rai laran tomak, tanba sidadaun sira hatoo agradesimentu ba dedikasaun istoriku neebe nia husik hela ba libertasaun no kontrusaun Estadu.
Iha espasu sosial no midia sira, reasaun publiku hatudu katak, Francisco Guterres Lu Olo nuudar figura neebe dedika nia an tomak ba luta libertasaun nasional. Komentariu sira neebe mosu nuudar manifestasaun sentimentu agradesimentu ba nia kontribuisaun nuudar Prezidente Parlamentu Nasional Primeiru, neebe lori Timor-Leste ba restaurassun independensia iha 20 Maiu 2002.
Iha fatin seluk sidadaun sira mos hasai sira nia sentimentu hodi fo agradesimentu ba Lu Olo nia pasiensia no hahalok kmanek neebe nia hatudu ba povu tomak. Ema sira sente katak Timor-Leste lakon figura ida neebe iha laran diak sempre tau povu nia interese iha fatin dahuluk, maski iha momentu nasaun hasoru dezafiu neebe makas.
“Nia laos deit lider politika ida, maibe figura ida neebe dialogu no pas,” lia fuan sira neebe repete husi publiku iha espasu sosial sira, hodi refleta respeitu ba ninia mandatu nuudar Prezidente Republika iha periodu 2017-2022.
Governu Timor-Leste deside ona atu Dekreta loron hitu (7) ba Lutu Nasional nuudar sinal respeitu ba nia kontribuisaun ba kontrusaun Estadu. Durante periodu nee, bandeira Nasional sei hatun ba klaran iha instituisaun publiku sira hotu.
Entretantu família husu ba povu tomak atu hamutuk iha orasaun no respeita privasidade iha tempu difisil nee. Enkuantu Governu sira prepara hela serimonia funebre ho ondra Estadu nian ba Eis Xefe Estadu nee.
(car)
