DILI, STLTIMORLESTE.com – Membru husi Organizasaun Popular Mulher Timor (OPMT) sente triste tanba lakon tebes ona lider diak ida eis Prezidente Republika Francisco Guterres “Lu Olo”.
Lia hirak nee hatoo husi Konselhu Kordenador OPMT Munisipiu Dili, Marquita Soares ba STL iha Farol, Segunda (22/06/2026).
Nia hatete, sente triste tanba lakon aman diak ida neebe durante nee sempre korajen sira ho liafuan kalma, maske hasoru dezafiu maibe lider istoriku nee sempre ho liafuan simples, katak kalma buat hotu neineik sei lao diak, maibe ohin sente lakon tebes ema diak ida neebe povu no rai nee sei presiza.
“Ami sente lakon tebes, lakon lider diak ida neebe durante nee ami hanoin buat hotu lao diak, bainhira ami hanoin rai nee la hakmatek, ami sempre hakbesik ba nia, curhat ho nia, nia sempre hatete ba ami katak kalma buat hotu lao diak, ami sente lakon, tanba saida mak ami sente lakon tanba luta ida nee seidauk too rohan, tanba promesa neebe hatete liberta rai maibe povu ida nee seidauk liberta, povu barak sei moris iha nakukun laran, sei iha mukit no susar nia laran, tanba ida nee mak ami hanoin lakon,” dehan Konselhu Kordenador OPMT Munsipiu Dili.
Nia hatete, sente lakon tebes duni aman diak ida neebe durante nee sempre hamutuk no motiva sira, maske hasoru dezafiu maibe aman luta nain sempre ho oin midar enkoraja sira ho liafuan kalma buat hotu lao diak.
“Ami sente katak lakon no lakon ida neebe lakon tebes duni, tanba nia moris 24 anos iha ai laran ho prisipiu mate ka moris luta ba ukun rasik hodi kore povu no rai nee, maibe luta ida nee saidauk remata tanba povu sei morik kiak no mukit, promesa neebe saudozu sira husik hela ba nia katak kontinua nafatin hodi liberta povu maibe too ohin loron povu balun moris kiak maibe nia husik ona mundu, ida nee ami sente lakon tebes duni,” dehan nia.
Nia mos konta katak so Prezidente Partidu FRETILIN Saudozu Francisco Guterres Lu Olo mak sempre hamutuk ho sira bainhira halao atividade ruma, no bainhira membru OPMT presiza saudozu sempre prontu hamutuk ho sira maibe ohin lakon ona laiha lider ida neebe diak hanesan saudozu.
“Nia mak kaer FRETILIN husi ai laran too mai ohin loron, nia nafatin FRETILIN, luta nee seidauk remata,” dehan Marquita.
“Ami OPMT halo atividade nia sempre marka prezensa, nia la dehan katak laiha tempu, sempre iha tempu hela deit mai ami, maske ami iha konferensia ruma neebe ami organiza nia sempre prontu, ida nee mak ba ami nunka halao iha ami OPMT liu liu OPMT munisipiu Dili,” katak nia.
Eis Prezidente Republika (PR), Lu Olo mate iha Hospital Prince Court, iha Kuala Lumpur, ho tinan 71, hafoin halao tratamentu intensivu. Entretantu Francisco Guterres “Lu-Olo”, Moris iha Ossu, Distrito Viqueque, iha 7 Setembro 1954.
Lu-Olo kaben ho Cidalia Lopes Nobre Mouzinho Guterres, no sira iha oan nain-haat, Francisco Cidalino, Eldino Nobre, Felezito Samora Guterres no Dalia Luliana Nobre Guterres.
(eme)
