DILI, STLTIMORLESTE.com – Fenomena rai nakdoko iha area foho Builo, Postu Administrativu Ossu, Munisipiu Viqueque, hahu mudansa.
Komandante Operasaun Autoridade Protesaun Sivil (APC) Munisipiu Viqueque, Cerilo Soares Gomes aprezenta, fenomena rai nakdoko iha area juridiku Munisipiu Viqueque kada loron akontese hahu husi loron 07 Junhu ne. Tuir dadus neebe antes nee iha, fenomena nee akontese kuaze kada loron no iha tempu balu bele akontese too dala sia (9) neebe tuir dadus husi Institutu Jeosiensias Timor Leste (IGTL-sigla português) hatudu, rai nakdoko nee ho magnitude 4 konsidera rai nakdoko makaas iha area neebe besik liu liu iha area foho Builo.
Maibe fenomena rai nakdoko neebe durante nee komunidade sira inklui ekipa APC Munisipiu Viqueqeu neebe destaka iha area foho Builo nian nota, iha loron 21 Junhu nee (parte kalan) too loron 22 Junhu (parte meudia) nee hahu mudansa.
“Rai nakdoko rutina bainhira foho Builo tarutu ona nee sempre afeta rai nakdoko, mais la boot hanesan uluk uluk nee ona 4,4 eskala nee. Hodi kalan akontese mais kiik liu ona husi dader too mai agora nee seidauk iha sinal ruma,” hateten Komandante Operasaun Autoridade Protesaun Sivil (APC) Munisipiu Viqueque, Cerilo Soares Gomes ba STL liu husi telefone (22/06/2026).
Nia esplika, durante rai nakdoko ho magnitude 4 neebe konsidera makaas, komunidade sira iha area foho Builo kalan kalan toba deit iha rai, tanba tauk, maibe iha parte kalan loron 21 Junhu nee, komunidade sira hahu toba fali ona iha sira nia kama toba fatin nian.
Aliende mos nia dehan, durante rai nakdoko iha area refere la rezulta ema kanek no uma hetan estragus, maibe mosu fenomena seluk mak mosu tahu ten nafurin inklui rai nakfera, maibe la prejudika ba ema nia vida no seluk tan.
“Ita nafatin halo monitorizasaun ba ita nia komunidade sira iha neeba, ita nia ekipa kalan kalan nafatin halo vizilanjia iha neeba,” Cerilo komenta
(tom)
