DILI, STLTIMORLESTE.com – Sidadaun husi Munísipiu Manufahi kontente ho konsulta massal neebe halao husi ekipa Hospital Nasional Guido Valadares (HNGV)bá komunidade Daisua iha loron hirak liu ba.
Tuir Sidadaun Manufahi, Berta da Costa katak, konsulta massal neebe halao husi ekipa mediku husi Hospital Nasional Guido Valadares (HNGV) nian bá komunidade sira iha fatin neeba diak tebes, tanba bele tulun sira nia kondisaun saude. Komunidade balun moras maibe labele asesu bá iha sentru saude sira tanba kestaun transporte no seluk tan. Neebe ho eventu sira hanesan nee ajuda tebes sira, hodi bele hetan konsulta husi pesoal saude sira.
“Nuudar Manufahi oan hau sente kontente ho prezensa ekipa HNGV nian, neebe halo konsulta massal bá maluk sira iha Daisua. Tanba ita hatene katak, maluk balun dala ruma moras lakohi ou hakat mai sentru saude sira tanba kestaun barak, liu-liu transporte no distansia uma neebe dok husi sentru saude sira,” dehan nia bá STL iha Kampung Baru, Segunda (22/07/2026).
Nia hatutan, husu bá ekipa hospital tantu husi nasional no munisipiu labele mai iha Suku Daisua deit, maibe se bele planu ba too iha area rurais sira neebe susar asesu ba klinika sira tanba kestaun dalan, transporte no distansia neebe halo maluk komunidade sira iha area rurais la konsege hakbesik aan bá sentru no postu saude sira bainhira sira moras.
Entretantu iha sorin seluk liu husi pajina offisial HNGV neebe diariu nee sita katak, HNGV halao atividade konsulta massal ba komunidade Munisípiu Manufahi, Postu Administrativu Same, Suku Daisua, iha 19 Junhu tinan nee. Atividade ida nee halao iha Eskola Desa Daisua-Same, Munisipiu Manufahi, hodi selebra loron aniversariu HNGV ba dala XXIII neebe mak akontese iha dia 29 de Junhu 2026 ho tema “Servisu ho Konsensia, Avansa ho Siensia, Forte no unidade”.
Prezidente Komisaun Organizadora ba aniversariu HNGV ba 23, Eligio A. de Araújo Soares hateten, tema ba tinan aniversariu HNGV ba dala 23 mak “Servisu Ho Konsiensia, Avansa Ho Siensia, Forte No Unidade” hodi atende povu tomak neebe persiza tulun liu-liu liga ho saude.
Nia afirma, tinan-tinan HNGV halao atividade konsulta massal hodi selebra loron aniversariu HNGV ho objetivu atu lori ekipa saude hakbesik ba komunidade sira iha area remotas neebe tinan ida nee realiza iha Suku Daisua, Munisipu Manufahi.
Nia hateten, maske dala barak hetan lamentasaun husi komunidade kona-ba limitasaun iha HNGV tantu atendimentu, konsumavies no rekursu humanu, HNGV nafatin hamriik ho hateke ba oin ho servi no atinji hamutuk ba TL neebe moris saudavel.
Nia haktuir, ekipa HNGV neebe fo tratamentu iha komunidade Munisipiu Manufahi kompostu husi mediku espesialista iha area espesializada mak hanesan medisina interna (moras laran), cirurjia jeral, ortopedia (ruin) cardiologia (fuan) nefrologia (rins) pulmonologia (pulmaun) oftalmologia (matan) estomatologista (nehan), bbsgyn (inan isin rua/moras ba feto), dermatologia (kulit), pediatria (labarik kiik), endocrin, radiologia, psikiatria (saude mental) intensivista no anesthesia.
Nia hateten, ekipa seluk mak hanesan mediku jeral, enfermeiru, parteira, tekniku aliadus no ekipa apoiu husi motorisita, lojistika no administrasaun.
Atividade nee rejista atendimentu ba komunidade Munisipiu Manufahi hamutuk 1,728 kompostu husi mane 735 no feto 995.
(dom)
