DILI, STLTIMORLESTE.com – Timor Leste sei hela iha sentimentu lutu boot bainhira lakon figura ida neebe konsideradu nuudar kompanheiru da luta no Eis Prezidente Republika, Francisco Guterres Lu Olo. Lakon nee laos deit hamosu sentimentu saudade maibe mos sai nuudar momentu reflesaun ba povu tomak kona-ba kualidade lideransa no disiplina neebe saudozu husik hela.
Eis Titular, Taur Matan Ruak nuudar kompaneiru da luta neebe besik liu ho saudozu, hatoo ninia omenajen ikus iha rezidensia Farol, Díli, hodi valoriza katak, nasaun lakon ema diak ida neebe kontribui ona ba nasaun no jerasaun foun sira.
“Timor Leste lakon ema diak ida. Maun Lu Olo ema ida neebe sente determinadu, disiplinadu no kumpridor. Maibe dalan mak nee hotu, obrigadu ba maun Lu Olo tanba nia kontribui fo hela Timor ba ita hotu, liu liu ba eransa foun sira neebe tuir mai,” Taur Matan Ruak hateten ba jornalista sira, bainhira presta omenajen ikus ba saudozu nia isin mate, neebe rai iha rezidensia Farol, Díli, Tersa (23/06/2026).
Taur Matan Ruak fahe mos momentu neebe nakonu ho sentimentu bainhira sira nain rua hasoru malu iha hospital iha Malazia, neebe sai nuudar despedida ikus antes saudozu hakotu iis iha loron 21 Junhu 2026.
“Ami nain rua ba hamutuk ba hospital, nia hela hau fila. Antes hau fila hau despede, hau hatete ba nia katak, ami hotu la haluha nia, hamutuk ho nia nafatin. Finalmente nia hakuak ikus fo ba hau iha Malazia. Nee duni destinu hanesan nee. Ita sira neebe moris, forsa nafatin,” Eis Titular nee dehan ho laran todan.
Eis Prezidente Republika no Eis Primeiru Ministru iha Governu da 8 nee mos fo korajen ba família enlutadu, liu-liu ba kaben Cidalia Lopes Nobre Mouzinho Guterres no oan sira, hodi garante katak nasaun tomak hamutuk ho sira iha momentu difisil nee.
Iha parte seluk nia hatoo agradesimentu ba populasaun tomak iha Dili no iha fatin hotu hotu, neebe hatudu solidariedade makaas hodi manifesta laran susar ba lakon boot nee.
“Buat hotu neebe nia iha nee tutur lisuk, sasan sira nia husik hela, nia agora tau hela ba ita sira neebe moris, liu-liu ba eransa foun sira nee, nee imi nia tempu ona,” nia afirma.
Iha parte ketak, Eis Deputadu Partidu Demokratiku (PD) no Eis Membru Konselhu Estadu, Virgilio Hornai fo sai nia agradesimentu
no respeitu boot ba figura Lu Olo. Tuir nia, Lu Olo rai hela memoria neebe furak tebes ba jerasaun foun sira atu banati tuir, liu-liu konaba prinsipiu dedikasaun determinante nian iha jornada luta no post restaurasaun independensia nian.
“Saudozu Francisco Guterres Lu Olo sai ezemplu ba lider jerasaun sira hodi banati tuir nia simplisidade iha serbi Estadu. Nuudar Eis Prezidente Parlamentu Nasional no Eis Prezidente Republika, nia hatudu katak lideransa neebe loos mak servi Estadu ho laran metin,” dehan Virgilio.
(car)
