DILI, STLTIMORLESTE.com – Inan aman graduadu husi Universidade Nasional Timor Leste (UNTL), neebe hein deit loron sira nia oan atu hakat ba faze graduasaun, sente kontente no agradese ba dedikasaun husi parte hotu nian, liu husi Maromak nia diak tomak neebe soi bá ema hotu.
Tuir Inan Maria Soares katak, nudar inan no aman sente kontente bainhira oan ida bele halo remata nia estudu iha banku universidade nian, tanba lori prosesu no tempu naruk mak ohin loron sira bele remata ho diak. Buat hotu neebe lao diak, uluk nanain agradese bá Maromak, tanba Nia diak tomak neebe haraik ba ema hotu, husi dedikasaun dosentes no familia ohin sira bele prontu no prepara ba graduasaun.
“Nudar inan aman no familia, hau sente kontente no agradese tebes ba sira nia prosesu. Tanba prosesu hotu neebe atu hetan nia rezultadu diak, presiza pasiensia husi ema idak-idak nia aan hodi bele hakur tempu neebe naruk. Agora nee sira prepara aan hodi hein deit simu graduasaun neebe sei halao iha loron rua ka tolu mai nee,” dehan nia bá STL iha Vila Verde, Tersa (23/06/2026).
Nia hatutan, graduadu sira, inan aman, dosente hamutuk ho funsionariu sira husi Universidade Nasional Timor Leste (UNTL) nian tuir misa agradesimentu bá graduadu sira iha Igreja Katedral neebe halao iha Segunda.
Nunee mos Graduadu Rofina husi Fakuldade Edukasaun no Humanidades hatete, nia sente kontenti tebes tanba sira judisium hotu ona, no agora sira hein deit graduasaun, nee kompletu ona. Maluk balun neebe iha hanoin atu kontínua tan konforme vontade deit.
“Depois remata husi nee nudar graduadus, hau rasik tenke buka servisu bá aan, tanba laos depois graduasaun, graduadu hotu atu okupa fatin iha governu, nee sei la akontese. Neebe ita ida-idak mak tenke buka rasik,” dehan nia.
Nia hatutan, neebe dadaun nee sira prepara aan hela bá graduasaun nian. Iha Segunda misa agradesimentu bá graduadu sira hamutuk ho inan aman, dosentes nomos fungsionariu Sira hotu husi UNTL nian.
Iha sorin seluk liu husi pajina UNTL neebe STL sita katak, iha Segunda (22/06/2026), UNTL liu husi Gabineti Provedor do Estudante (GPE), realiza misa agradesimentu ba graduadu nain 1.461 neebe prepara ona ba graduasaun iha període dahuluk tinan akademika 2026 nian ba dala XXXIV, iha Igreja Catedral, Dili.
Iha omilia, Pe. Clemente Moreira Fdcc hatete, hamutuk hahi ba Maromak Nia diak tomak neebe soi ona ba ema hotu. Hanesan ema neebe intelijente laos akademiku deit, maibe hanesan mos ema fiar nain hodi relembra graduadu, família no dosente sira-nia dedikasaun, esforsu, tempu, pasiensia too ohin loron sira remata ona.
“Hanesan ema fiar nain hamutuk ho família no sivitas tomak selebra Santa Misa ida nee hodi hasae agradesimentu ba Maromak nia grasa, intelijensia, sabedoria no matenek nuudar momentu neebe espesial iha apostulu sira-nia moris nunee mos ita lao hamutuk ba oin ho konfiansa too susesu iha futuru tuir kualifikasaun neebe forma tiha ona husi UNTL,” dehan Padre Clemente.
Magnífiku Reitor,Joviano António da Costa, agradese ba Padre, Madre inklui komisaun organizadora ba realiza ona misa nee no preparasaun sira ba serimónia solene graduasaun nian.
“Ohin ita agradese ba Maromak, tanba la fasil ba ita atu too momentu ida nee, hau fiar katak too iha faze ida nee ho sakrifísiu boot hodi atinji objetivu ida mak sai lisensiadu no mestradu. Atinjimentu ida nee mak ita-nia orgullu, tanba nee UNTL hakarak hatoo parabéns no susesu ba imi hotu. Agradese mos ba ema hotu neebe hola parte iha preparasaun ba misa ida nee ho susesu,” dehan nia.
Misa agradesimentu nee, akompaña husi Amu Kapelaun n Padre Nivio Correia Lebre Fdcc no Padre Fermin Leoveras Fdcc.
Partisipa husi Prezidente Komisaun Organizadora ba graduasaun nian, atual Visi Reitor ba Asuntu Akademiku, Profesór Câncio Monteiro, Visi Reitor, Proreitor, Diretur Jeral, Diretur Nasional, Xefe Departamentu, Dekanu, Dosente, Funsionariu, Inan-Aman no Graduadu sira.
(dom)
