DILI, STLTIMORLESTE.com – Negosiante tais Colmera la hetan rendimentu diak, tanba vizitante no komprador sira menus kompara ho tinan 2010.
“Kona-ba negosiante artezenatu ami la defini ba loron, tanba negosiante tradisional nee iha fatin nee hamutuk uma 45, tan nee loron ida ami la hetan rendimentu, tanba ema sosa menus,” hatete Sekretáriu Tais Market Colmera, Manuel Amaral Casimiro ba STL iha Colmera, Kuarta (24/06/2026).
Nia haktuir, tais folin nee iha tinan 2010 loron ida bele hetan US$ 100 tanba iha nasaun seluk mai TL kompara ho tinan 2011 too agora rendimentu kada loron hahu menus, afeita ba iha rendimentu, dala ruma loron ida la hetan.
Tanba sasan tradisional barak liu neebe faan iha fatin, entaun depende tuir ema neebe mai haree no sosa.
Nia dehan, ema estranjeiru mai vizita sosa, maibe situasaun agora susar kuandu iha Selebrasaun loron 20 Maiu, loron 30 Agostu, loron 12 Novembru ema mai vizita hola, ema husi liur mai vizita sira sosa.
Tais neebe faan nee laos produs rasik, maibe fo hela trabalhu ba inan feton sira iha area rurais.
“Ita fo hela servisu ba sira, fo apoiu ba sira iha area remotas bele hetan rendimentu husi ami,” dehan nia.
Tais neebé faan iha nee sosa husi Munisipiu Lospalos, Baukau, Viqueque, Suai, Bobonaro no Ermera, maibe tais barak mai husi Bobonaro no Ermera, maibe nia presu diferente hanesan Lospalos, Baukau, Suai, Bobonaro presu neebe aas oituan, tanba haree tais ninia kualidade.
Tais mane presu US$ 40 too US$ 80, tais feto presu US$ 40 ba US$ 60, maibe faan tutan US$ 30 too US$ 100, maibe faan haree ba kualidade tais nian, tais nee loke hahu iha 1993 faan tiha ona.
Nia esplika, iha fatin nee tais, tanba kreativu husi inan feto soru tais, homan luhu kaebauk, mortel no seluk tan, maske merkadu tradisional maibe akumula husi kreativu husi maluk individual ou grupu halo iha sira nia fatin hanesan Munisipiu Lospalos lori sira nia uma adat mai ami faan.
(joa)
