DILI, STLTIMORLESTE.com – Tribunal Judisial Primeira Instansia Dili (TJPID) halao julgamentu ba krime Furtu Agravadu, neebe mak komete husi arguida nain rua ho inisial AS ho VIL hasoru lezadu MF nudar laen.
Iha autos eziste indisiu sufisiente katak, arguida AS ho VIL nuudar inan ho oan.
Arguida AS ho lezadu MF nuudar feen laen no sira iha oan mane ida naran VMSF ho idade tinan 6.
Iha fulan Agostu 2022, lezadu deside sai husi uma ba hela fali iha Bebonuk, tanba iha problema ho nian feen arguida AS.
Nunee iha loron 12 fulan Dezembru 2022, oras tuku 08:30 OTL, lezadu ba servisu iha Munisipiu Lospalos, arguida AS ho VIL ba fali iha lezadu nian uma Bebonuk foti tiha lezadu nian motorizada marca Yamaha Xabre numeru matrikula K-8880 T1, koor metan hodi tula ba kareta no lori tiha ba sira nian uma iha Munisipiu Bobonaro sem konhesimentu lezadu nian.
Hafoin motorizada nee arguida sira tula tiha ba Bobonaro, too agora seidauk lori fila fali ba lezadu no arguidu sira apropria tiha lezadu nian motorizada.
Motorizada refere lezadu sosa ho osan ho montante USD.1.650,00 (rihun ida atus neen lima nulu).
Konsekuensia husi arguida sira nian hahalok nee, hamosu prejuizu konsideravel ba lezadu nian vida ekonomia.
Arguida AS ho VIL komete krime nee ho livre delibarada no konsientemente, hatene katak motorizada nee laos pertensia ba sira, maibe arguida sira hakarak apropria kontra lezadu nian vontade no kontra lei maibe arguida sira halo nafatin.
Arguida AS ho VIL hanesan ko-autoria material ba krime Furto Agravadu neebe previstu tuir artigu 2520 konjuga ho 30 hotu hotu husi KP.
Hatan ba akuzasaun nee, arguida AS konfesa ba Tribunal katak, faktus sira nee balun loos no balun sala, lezadu la iha problema ho arguida no arguida hatene mak lezadu mai servisu iha Dili. Iha tinan 2022 nee arguida ho lezadu la iha problema, maibe lezadu mak sai husi uma durante fulan neen nia laran mak, arguida tun mai Dili foti motor.
Arguida dehan, bainhira sai husi Maliana arguida mai ho nia Mae no fo hatene ba nia Mae katak, akompana arguida atu ba foti motor.
Arguida informa, arguida foti tiha motor mak tula ho bus no antes nee, arguida kontaktu ho lezadu atu foti motor, maibe lezadu hatan katak foti ba tanba xave lezadu la lori ba Lospalos.
Arguida dehan, sosa motor nee iha momentu sei iha relasaun feen ho laen, maibe seidauk kaben iha Igreza. No rezolve tiha problema nee no motor nee entrega tiha ba arguida.
Nunee arguidu VIL deklara, arguida nudar inan no akompana arguidu ba foti motor, tanba arguidu hatene katak motor nee nia inan nian.
Aleinde nee lezadu MF deklara, iha tinan 2022 problema nee tanba sira la hamutuk tiha, tanba nee mak buka servisu iha Dili iha tinan ida resin, la iha kontaktu ruma momentu arguida sira ba foti motor nee lezadu halao servisu iha Lospalos.
Lezadu esplika, antes arguida foti motor nee la kontaktu ba lezadu. No momentu hola motor nee arguida ho lezadu sees malu ona.
Lezadu dehan, motor nee entrega ona ba iha arguida hanesan arguida nia folin aumenta ho karau ida no belak ida.
Lezadu dehan, lezadu simu kontaktu husi nia subrinu katak, sira husi Maliana atu foti motor, tanba nee lezadu hatan katak labele foti motor lai tanba lezadu iha Lospalos.
Iha alegasaun Ministeriu Publiku husu Tribunal atu absolve arguida nain rua, tanba konsideta sira rejolva ona.
Nunee parte Defeza husu Tribunal atu absolve arguida nain-rua husi krime neebe mak Ministeriu Publiku imputa ba arguida nain-rua.
Hafoin rona tiha deklarasaun sira nee, Tribunal deside muda ba loron seluk hodi rona desizaun ikus.
Iha audensia Julgamentu nee prezide husi Juiz kolektiva, Jumiati Freitas, José Quintão, José Gonçalvez, Ministeriu Publiku reprezenta husi Prokuradora Benvinda do Rosario, no arguida sira hetan asistensia legal husi Defensor Publiku, Angelmo Akara Pinto.
(ter)
