DILI, STLTIMORLESTE.com – Graduadu sira tenke uza konhesimentu no kompetensia neebe hetan ona hodi kontribui bá dezenvolvimentu Timor Leste.
Liafuan nee hatete husi Reprezentante Magnífiku Reitor atual Visi Reitor Asuntu Akademiku, Câncio Monteiro liu husi nia diskursu iha ambitu serimonia judisium Faculdade de Ciências Sociais e Políticas (FCSP), Universidade Nasional Timor Lorosae (UNTL), iha Salaun Delta Nova, Tersa (23/06/2026).
Nia hatete, graduasaun laos deit serimonia administrativu, maibe hanesan kolleta rezultadu husi tinan 4 ka 5 husi estudante sira-nia esforsu no estudu.
“Graduadu sira tenke uza konesimentu no kompetensia neebe hetan ona hodi kontribui ba dezenvolvimentu Timor-Leste. Hadia governasaun, hamenus desigualdade, hametin instituisaun sira no promove relasaun nasional no internasional. Graduadu sira presiza iha kapasidade inovasaun, pensamentu krítiku no kriatividade atu buka solusaun ba problema sira neebe sosiedade enfrenta atualmente,” haktuir nia husi media sosial UNTL neebe STL asesu, Kuarta (24/06/2026).
Iha fatin hanesan, Dekanu FCSP, Alarico da Costa Ximenes hatete, eventu refere la selebra deit remata estudu ida, maibe mós hahu etapa foun ida iha moris graduadu sira nian.
Graduadu sira neebe ohin simu sira-nia títulu sai ona reprezentante husi FCSP no UNTL. Ho konhesimentu, valor no esperiensia neebe hetan ona, sira iha misaun atu kontribui ba konstrusaun sosiedade ida neebe justu, demokratiku, inkluzivu no sustentavel. Sira tenke sai profisional neebe iha responsabilidade, integridade no vontade atu lori mudansa pozitivu ba komunidade no nasaun TL,” tenik nia.
Nunee mos Finalista Sonia de Jesus husi Departamento de Políticas Publicas hatete, orgulhu, tanba bele remata estudu no hetan titulu liu husi esforsu boot.
“Durante estudu iha universidade, hau hasoru dezafiu barak, liu-liu pandemia Covid-19 neebe halo aula muda ba online no halo prosesu aprendizajen sai difísil, tanba menus interasaun direta ho dosente sira. Aleinde nee, hau mos hasoru difikuldade atu adapta ho sistema foun, problema ekonomia no fatin hela. Maske nunee, ho esforsu, pasiensia no determinasaun, konsege ultrapasa dezafiu sira hodi remata ha’u nia estudu ho susesu,” haktuir nia.
Judisium nee ho tema “Hakat ba oin ho Siensia, Kreatividade, no Integridade” atribui titulu akademika ba finalista nain 150. Total finalista husi Departamento de Administrasaun Publica (16), Siencia Polítika (24), Desenvolvimentu Komunitariu (25), Polítikas Publikas (18), Comunikasaun Sosial (30), Relasaun Internacionais (45) no Inclusão Comunitaria e Social (8).
(dom)
