BAUCAU, STLTIMORLESTE.com – Iha selebrasaun misa requiem ba saudozu Francisco Guterres Lu-Olo, Padre Evaresto Marçal hateten, saudozu Francisco Guterres Lu-Olo lider justu no prudenti tane interese komum.
Lia hirak nee Padre selebrante Evaresto Marçal liu husi nia omelia iha misa requim ba saudozu Francisco Guterres Lu-Olo, neebe inisia husi Autoridade Munisipiu Baucau realiza iha igreja Paroquia Santo António Vila Antiga Baucau, Kinta (25/06/2026).
“Falesimentu eis Prezidente Repblika Francisco Guterres Lu-Olo halo Timor oan hotu iha laran tristeza laran, tanba lakon lider osan mean, justu, prudenti, mestre neebe tane interese komum aas liu,” nia dehan.
Padre nee espresa, mate mak dalan final husi moris ida neebe la fihir ema riku ka kiak, beik ka matenek, maibe mate tuir tempu neebe termina ona. Tanba nee saudozu nia mate husik hela memoria umana nian, espiritu aten brani husi nia sakrifisiu luta ba autodeterminasaun povu no nasaun nia destinu iha momentu difisil.
Padre Evaresto konsidera, eis Prezidente Republika nia mate nee husik hela legadu, memoria espiritual no umana liu liu durante tinan 24 hamutuk ho nia maluk luta nain sira luta, tanba hanoin povu no rai Timor-Leste.
“Timor oan hotu atu reflete katak Eis Prezidente nuudar pesaal prudenti, justu, onestu, nia husik hela atu ema hotu aprende tuir hanesan lider ezemplar iha hakmatek, dame, justisa no unidade iha nasaun,” padre nee enkoraja.
Padre nee fundamenta, saudozu Lu-Olo nuudar pesoal fiar nain mesmu iha servisu todan maibe la haluha nia vida espiritual hanesan kada tinan hasae misa agradesementu asaun grasa nian ba nia serbisu.
Iha fatin hanesan Prezidente Autoridade Munisipiu Baucau, Veneranda Lemos hateten, selebrasaun misa requiem nee ba maktoban eis Prezidente saudozu Francisco Guterres Lu-Olo atu fo espasu Baucau oan sira partisipa hodi hasae orasaun no ultimu omenajen ba saudozu neebe konsidera lider umilde.
“Ita lakon eroi, laos deit lakon aman lutador maibe, ita halo refresaun katak, too ona idade 20 resin hanesan nasaun. Saudozu nuudar lider neebe laran maus, diak no fo aan dedika harii rai ida nee metin nafatin no hasai povu husik kiak no mukit. Ida nee hela ona istoria ba ita ida idak,” katak Veneranda Lemos.
Eis deputada nee hateten, husi misa requim nee ekipa husi Autoridade Munisipiu Baucau, sei reprezenta povu desloka ba Dili lori aifunan no lilin hodi fo ultimu omenajen antes saudozu Lu-Olo halot iha Jardim dos Eroi Metinaro Dili.
Iha selebrasaun misa requiem ba saudozu eis Prezidente Asembleia Konstituinte Francisco Guterres Lu-Olo nee, partisipa masimu husi estrutura Autoridade Munisipal Baucau, Postu, Suku, Autoridade Militar, estudante no komunidade sira.
(tom)
