DILI, STLTIMORLESTE.com – Graduadu sira neebe remata sira nia estudu iha banku universidade, kontente ho sira nia susesu neebe sira hein iha tinan barak, maibe mos triste bá sira tanba kampu servisu iha rai laran menus, nunee tenke hili dalan hodi kompete tuir teste servisu bá iha ema nia rai.
Graduadu Universidade Nasional Timor Lorosae (UNTL), Fakuldade Edukasaun, Mena Carvalho dehan, nia kontente no orgulhu simu graduasaun, tanba ida nee mak rohan husi nia prosesu estudu iha banku universidade nian ho tempu neebe naruk.
Nia katak, estudu remata ona, maibe atu asesu bá kampu servisu iha rai laran mak susar tanba menus kampu servisu. Haree bá situasaun real país nee nian numeru dezempregu loron ba loron aumenta, ema barak laiha servisu ho nunee hakarak lakohi tenke hili dalan tuir teste servisu ba iha rai liur.
“Nuudar graduadu, hau sente kontente tanba bele determina ona hau nia estudu iha universidade ho esforsu neebe durante nee hau ho kolega sira luta iha tempu naruk, dezafiu no problema lubun mak ami hasoru hamutuk, maibe la hamate ami nia esperansa. Nunee ohin loron bele remata ami nia estudu too hotu. Maibe depois remata husi nee ami tenke buka kampu trabalhu, bainhira la hetan no la konsege kria rasik servisu bá ami nia aan, dalan mak tuir teste trabalhador hodi bá servisu iha ema nia rai,” dehan nia ba STL depois remata simu graduasaun iha CCD, Kinta (25/06/2026).
Nunee mos Graduadu Jeraldo Mota dehan, susesu sira nee laos deit lori kontente no orgulhu bá sira nia aan maibe mos bá familia, dosente no entidade sira neebe akompanha sira nia prosesu husi inisiu too nia rohan. Susesu nee mos kahur ho preokupasaun kona bá kampu servisu nian.
“Simu graduasaun nee hotu-hotu kontente tanba bele determina ona ami nia estudu iha tempu naruk nia laran nunee ohin loron bele remata ami nia estudu iha banku universidade. Agora depois remata husi nee, ami idak-idak hakarak lakohi tenke buka kampu servisu bá ami nia moris. Hanesan graduadu neebe servisu kedas nee diak, maibe ami sira seidauk nee mak tenke lao buka no kria servisu bá ami nia aan rasik,” dehan nia.
Nia hatutan, haree bá situasaun real iha rai doben nee, numeru dezempregu makaas tanba kampu servisu iha rai laran menus tebes. Neebe graduadu sira barak mak sai trabalhador iha rai liur.
Inan Aman Graduadu, Thomas da Silva katak, nuuudar inan aman kontente no orgulhu bá susesu oan sira nian, neebe ho pasiensia no esperansa iha tinan barak nia laran hodi determina sira nia estudu iha universidade.
Nia hatutan, inan aman sira hakarak oan sira nia susesu, atu servisu ka lae importante inan aman dudu oan sira bá eskola, tanba liu husi edukasaun mak bele muda ema nia hanoin no moris. Atu kria kampu servisu bá dezempregu sira, governu tenke halo investimentu iha rai laran.
(dom)
