DILI, STLTIMORLESTE.com – Saudozu Eis Prezidente Republika atual Prezidente Partidu FRETILIN nia mate husik hela triste boot ba povu no militante Partidu FRETILIN, maibe Partidu FRETILIN sei firme nafatin ho povu iha rai ida nee.
Kestaun nee membru CCF, nomos Sekretariu Komisaun Politika Munisipiu Baucau, Elena Martins Belo ba STL iha Farol, Sesta (26/06/2026) hatete, saudozu Lu Olo nia mate husik hela triste boot ba povu no Militante FRETILIN, maibe Partidu FRETILIN sei firme nafatin.
Mezmu lakon ida nee husik triste boot ba povu no ba rai ida nee espesial ba militante FRETILIN maibe la signifika katak mate ida nee dezamina ona kuadru sira ka militante sira maibe nafatin luta iha fileira FRETILIN hodi luta ba bem star povu oinsa mak kore povu husik kiak no mukit.
“Ami iha esperiensia bainhira iha kampu batalaun iha situasaun difisil saudozu Nicolau Lobato husik hela mundu (mate) la husik hela lia menon ruma ba povu ida nee maibe FRETILIN ho nia forsa no kbiit iha povu entaun ami fiar katak sei iha lider ida neebe sei substitui realidade sira substitui malu too ita nia saudozu Lu Olo hanesan Prezidente asembleia konstituante, mai tan assume kargu nuudar Prezidente Parlamentu Nasional, nomos Prezidente Republika Timor Leste, neebe nia defensor da konstituisaun Defensor bens star, ami haree husi sira nee hotu,” nia hatete.
Nia hatutan, FRETILIN buka hakoak organizasaun hotu hotu oinsa mak forte hodi hasoru bens star ba povu.
Nia hatete, maske daudaun nee saudozu nuudar Prezidente Partidu laiha ona maibe FRETILIN nafatin firme hamutuk ho povu iha rai ida nee.
“FRETILIN firme nafatin, esesivu nafatin, nia isin mak la hamutuk ona ho ami maibe nia memoria nia istoria neebe husik hela nia legado neebe diak, mezmu ema nee iha karakter oin oin maibe ami sempre lao iha koridor displina FRETILIN nia,” katak nia.
Nunee mos membru CCF, hanesan mos koordenador komisaun Politika Munisipiu Baucau, Abrao Gabriel do Santos Oliveira hatete, saudozu ema ida neebe ho kalma.
“Ita boot sira haree tinan 20 resin re organiza FRETILIN ita boot sira hatene laos segredu mosu situasaun hotu iha laran maibe nia tenta hakalma nafatin simu no rona dala ruma enkontru iha komite central nee manas,” katak nia.
Oinsa ho esparansa ho Prezidente Partidu FRETILIN mai neebe sei substitui saudozu nia fatin, tuir membru CCF katak iha esperansa boot lao tuir saudozu nia ain fatin lori FRETILIN ba oin.
“Maibe ita hatene katak iha regra iha estatutu partidu mak regula iha nia prosesu rasik, tanba nee ita hein nia prosesu los tiha, tanba sei iha konferensia munisipiu, depois tama preparasaun depois kongresu mak sei deside ida nee, hein enkontru Komite Central para fo orientasaun halao serbisu,” katak nia.
Se deit mak eleitu nia karakter la hanesan maibe hanesan partidu estatutu mak regula laiha ema ida mai halo tuir nia hakarak maibe estatutu mak regula, no estatutu partidu klaru, lideransa neebe reprezenta partidu nee Prezidente ho Sekretariu Jeral nee tuir estatutu.
“Ami membru Komite Central maibe ami serbisu tuir buat neebe reprezenta partidu mak Prezidente ho Sekretariu Jeral,” katak nia.
(eme)
