METINARO, STLTIMORLESTE.com – Mate isin eis Prezidente Republika, eis Prezidente Parlamentu Nasional no Prezidente Partidu FRETILIN, Saudozu Francisco Guterres Lu Olo haloot ona ho dignu iha Jardín dos Herois da Pátria Metinaro, Munisipiu Dili. Saudozu Lu Olo husik hela faluk Cidalia Lopes Nobre Mouzinho Guterres no oan nain haat kompostu husi Francisco Cidalino Guterres (Olo Kay), Eldino Nobre Guterres, Felizitu Samora Nobre Guterres no Dalia Luliana Nobre Guterres.
Iha ambitu serimónia funeral Saudozu Francisco Guterres Lu Olo iha Jardín dos Herois da Pátria Metinaro, Sesta (26/6/2026), saudozu nia oan ikun, Dalia Luliana Nobre Guterres, hafalun entidade hotu neebe partisipa iha serimonia funeral nee iha situasaun silensiu nia laran, bainhira nia lee poizia ba nia aman.
“Papa la katak buat ida mai hau. Iha Aeroportu Papa fo deit hakuak ida ho hamnasa,” tenik Dalia hodi hato’o mensajen ikus ba nia aman doben, saudozu Francisco Guterres Lu Olo.
Poizia ho titlu “Ultimu Abrasu Husi Oan Dalia ba Papa” dehan, “Papa foti ain husi uma, Papa la katak buat ida mai iha hau. Iha Aeroportu, Papa fo deit hakuak ida ho hamnasa furak ida hodi halo hau laran metin”.
“Teki-teki rona lian ida to’o mai hau tilun, katak hau tenke ba haree Papa ho fuan ksolok no saudades hakarak loos to’o lalais atu ba haree no hakuak Papa. Wainhira hau to’o iha neebá, hau hateke ba Mama nia mata-ween mak sai. Mama nia resposta, iha Mama nia hakuak hau hetan resposta katak Papa la iha tiha ona. Iha fuan rahun nia laran hau halai ba hakuak Papa, maibé hau tarde tiha ona, hakarak rona Papa nia lian maibé Papa nia lian laek tiha ona. Nai, hau fuan sei nurak, hau neon la dauk metin, hau nia maun sira mós sei kiik tanba sá Ita-Boot lori nia sedu liu, iha tempu neebé ami sei presiza nia mak ami nia ai-mahon no fatin sadare hodi ami helik an bá iha udan no anin boot. Hau saudades buat hotu kona-ba ó Papa hakuak neebé sente hau kariñu, estima neebé halo hau seguru hamnasa midar neebé lori hau haksolok, Papa ó ba ho amnasa fila ho mata-been hodi falun ami ho susar ho mata-been. Ohin Papa nia fatin mamuk, Papa nia lian deit lakon iha uma maibé la nia domin nafatin moris iha memoria sira neebé Papa husik iha ami ida-idak nia fuan. Papa iha leten aas neebá kontinua harohan no hananu ba ami ho Mama, no ami iha nee harohan ba Papa. Adeus, adeus, adeus Papa,” tenik Dalia ho matan been.
Serimonia funeral Saudozu Francisco Guterres Lu Olo nee hahu ho bensaun rate neebe halo husi Bispu Deoseze Baukau, Leandro Maria Alves, ho tiru saltu ho kilat no kainaun dala 21. Alein de nee, Xefe Estadu-Maior Jenerál FALINTIL-Forsa Defeza Timor-Leste (F-FDTL) Tenente-Jenerál Domingos Raul “Falur Rate Laek”, entrega lembransa medalla ba saudozu nia oan dahuluk, Francisco Cidalino Guterres ‘Olo Kay’.
Prezidente Repúblika, José Ramos Horta entrega Bandeira Repúblika Demokrátika Timor-Leste (RDTL) ba saudozu Prezidente Asembleia Konstituente, antigu Prezidente Parlamentu Nasionál, eis-Prezidente Repúblika no Prezidente Partidu FRETILIN, Francisco Guterres Lú Olo, nia oan mane Eldino Nobre Guterres no antigu Prezidente Repúblika no eis-Primeiru Ministru, Jeneral Taur Matan Ruak entrega Dekretu do Prezidente RDTL ba saudozu nia oan feto ikun Dalia Luliana Nobre Guterres.
Antigu Prezidente Repúblika no eis Primeiru Ministru, Jeneral Taur Matan Ruak akompania husi Jeneral Lere Anan Timor no Xefe Estadu Maior F-FDTL, Tenente Jeneral Domingos Raul “Falur Rate Laek” entrega Bandeira FALINTIL ba saudozu eroi Nasionál Francisco Guterres Lú-Olo nia oan mane Felizitu Samora Nobre Guterres.
(mik/ger/jen/emi)
