METINARO, STLTIMORLESTE.com – Reprezenta familia Saudozu Francisco Guterres Lu Olo hato’o agradese ba povu no aileba sira ho mós jornalista sira, IX Governu Konstitusionál no Autoridade Seguransa hotu neebé hola parte iha prosesu hotu falesimentu Saudozu Francisco Guterres Lu Olo to’o serimonia funeral iha Jardin Eoris Metinaro.
Domingos Guterres, alin husi Saudozu Francisco Guterres Lu Olo hato’o lia hirak nee iha nia diskursu reprezentante familia iha ambitu serimónia funeral Saudozu Francisco Guterres Lu Olo iha Jardín dos Herois da Pátria Metinaro, Sesta (26/6/2026).
Liu husi diskursu, Domingos Guterres hateten, orgullu ba sira hanesan familia maktoban ninian, no la haluha mós agradese ba povu doben Timor-Leste tomak husi nivél nasionál to’o iha baze, ba sira nia partisipasaun no sira lakon duni sira nia ema diak ida.
Nia mos agradese ba IX Governu Konstitusionál neebé liuhusi servisu Ministru Asuntu Kombatentes Libertasaun Nasionál (MAKLN) Gil da Costa Monteiro “Oan Soru” neebé durante nee akompania família to’o haloot saudozu ho diak no dignu.
“Nuudar maktoban ninia família, ami orgullu liu husi senhór Ministru no Sekretáriu Estadu no ami nia partidu FRETILIN ho nia membru tomak neebé akompania no fó korajen tomak ida nee ami orgullu. Aleinde nee mós ba FALINTIL-Forsa Defeza Timor-Leste (F-FDTL), Polísia Nasionál Timor-Leste (PNTL) no mós média/jornalista sira hotu neebé halo kobertura iha biban ida-nee, ami hakruk no agradese tomak ba sira hotu,” dehan Domingos Guterres.
Nia hato’o mos agradese ba polítiku no kamaradas hotu-hotu neebé mak iha Timor-Leste, tanba saudozu nia isin-mate partidu polítiku hotu-hotu nia prezensa, ida nee mak Lú-Olo duni.
“Lú-Olo ema ida pasensia, simples maibé fó ezemplu ba ema hotu. Hau orgullu duni ba hau nia maun tanba fó ezemplu diak bá hau. Nunee mós hau husu ba membru sira hotu-hotu neebé mak iha partidu FRETILIN sai modelu ida nee, Francisco Guterres Lú Olo mak mate espiritu Lú-Olo tenke moris iha FRETILIN nia laran, no ba povu hotu-hotu iha Timor-Leste,” katak Domingos Guterres.
Domingos Guterres haktuir tan katak durante maktoban moris iha vida polítika no rezisténsia nia laran, sé karik halo buat ruma la loos husi nia desizaun no orientasaun sira karik reprezenta família hakruk no husu deskulpa.
Rekomenda ba Estadu No. Governu Hadia Sistema iha Setor Saude
Nuudar alin nomos reprezenta familia, Domingos Guterres hato’o rekomendasaun ba Estadu no ba Governu atu hadia sistema iha setór saúde Timor-Leste. Atu nunee, bele fó atendimentu ida diak no dignu ba nia povu sira.
“Timor-Leste iha osan barak, saida mak falta tan, rekursu mak la iha ka aparelu mak la iha ka jestaun mak menus, presiza tenke halo diagnotisku ida klean,” dehan Domingos Guterres.
Ba parte Governu, katak Domingos, família Saudozu Francisco Guterres Lú Olo nian rekomenda hadia sistema no mekanizmu neebé mak agora dadauk iha.
“Atu hadia buat hirak sira nee laós governu nia sala deit, maibe ita hotu-hotu nia kontribui para bele hadia ita nia sistema saúde neebé mak agora dadauk iha. Investe bá aparelu neebé mak iha para bele asegura ita nia veteranu sira no sira tuir mai, ita hakarak hadia atu labele sofre tan situasaun sira hanesan nee,” rekomenda Domingos Guterres.
Familia Saudozu Francisco Guterres Lu Olo mos hato’o rekomendasaun ba parte estadu no governu no mós ba partidu.
“Ba estadu hau hanoin tempu to’o ona para hadia ita-nia estadu neebé ba diak neebé dignu no proteje ita nia sosiedade hotu-hotu tantu iha nivél nasionál to’o munisípiu,” dehan Domingos.
Rekomenda mos ba Sekretáriu Jerál Partidu FRETILIN ho nia membru komité Sentrál FRETILIN (CCF) husi nivél nasionál to’o suku, tempu ona tenke pasiensia, tenke hatudu duni katak Lú Olo sai ezemplu.
“Lu Olo, ema ida pasiensia, lakohi koalia barak nia hakarak buka mak amizade neebé barak. Diak liu amigu duké inimigu. Hau hanoin ba kamarada sira kadaves liafuan nee ladún diak maibé to’o ona tempu ita tenke onestu ona, para hadia sasán sira nee ho diak,” hatete Domingos Guterres.
Iha fatin nee mos, Domingos Guterers hato’o agradese ba povu Timor-Leste tomak, neebé mai prezensa iha serimónia maktoban Eroi Nasionál Francisco Guterres Lu Olo nia fatin deskansa ikus nian iha Jardín Herois da Pátria Metinaro.
Nia dehan, povu hotu-hotu triste, laós família de. Timor Leste triste hotu, tanba Lú-Olo ema simples maibé hakarak duni hakuak ema hotu. Nia la haree ba kor, la haree ba rasa, la haree ba metan ga mutin maibé nia haree hanesan ema Timor oan.
(mik/ger/eme/jen)
