DILI, STLTIMORLESTE.com – Hospital Nasional Guido Valadares (HNGV), ohin Segunda (29/06/2026), halo lansamentu sistema dijitalizasaun kartaun saude ba pasiente sira neebe mai halo tratamentu iha fatin refere, atu nunee labele forma naruk hodi rejistu manual iha surat tahan ho prosesu neebe naruk.
Tuir Diretor Ezekutivu HNGV, Nuno Vital Soares katak, dijitalizasaun produs ona kartaun saude ba pasiente sira, nunee ohin hahu uluk iha HNGV. Ho kartaun nee bá oin sei rejistu iha internet deit iha uma molok mai konsulta iha OPD HNGV. Dijitalizasaun produs ona kartaun saude neebe antes nee mai rejista ho manual deit ho kartaun neebe naruk, ho dijitalizasaun nee bainhira iha neebe deit bele rejistu. Ho dijitalizasaun nee HNGV sai hanesan projetu ida, depois Ministeriu Saude konfirma no junta mos dijitalizasaun envia ba munisipiu hotu.
Bainhira moras iha Lospalos no Maliana, kartaun nee deit iha Lospalos no Maliana tau iha sentru ita bele haree ona. Doutor sira iha Maliana bele haree ona pasiente nee konsulta iha HNGV, tratamentu neebe presiza haree bele liu deit husi dijital. Kartaun nee komesa agora lao ona ohin iha HNGV, pasiente sira mai la simu ona surat tahan, maibe sei simu fali kartaun nee. Kartaun dijital nee mediku ho pesoal pasiente mesak mak hatene deit, ema seluk sei la haree dadus no arquivu moras nian. Ho kartaun nee moras sira la forma naruk hanesan rejistu iha surat tahan, maibe halo faze por faze neebe sei kria pakote neebe rejistu tuir internet deit,” dehan nia ba jornalista sira iha ambitu serimonia aniversariu HNGV ba dala XXIII, Segunda (29/06/2026).
Nia hatutan, la forma naruk ona hanesan rejistu iha surat tahan, maibe sei halo faze por faze neebe sei kria pakote neebe rejistu tuir internet deit. Hanesan hakarak konsulta nehan, depois husi nee operador sira sei responde ba pasiente sira. Kartaun saude dijital neebe produs ona, agora daudaun bele dehan barak maibe labele fo sai lai.
Entretantu tuir Pasiente Olga Soares hatete, dijitalizasaun nee diak tanba la mai forma sedu no naruk iha HNGV ona, tanba nia bele fasilita rejistu iha uma deit, depois mak mai hasoru doutor sira. Maibe nia problema mak moras sira tenke iha telefone no ense pulsa para bele asesu internet hodi rejistu, neebe buat rua nee iha diak no la diak hotu.
(dom)
