DILI, STLTIMORLESTE.com – Relasiona ho kazu sira neebe akontese hanesan oho aan, soe bebe, tenta oho oan rasik no abandona oan, dala ruma mos tanba ambiente moris neebe la favoravel hodi halo ema hanoin badak foti desizaun iha nia moris, nunee ikus tenke halakon nia aan nomos ema seluk nia vida.
Profesora Eskola CAFÉ Maliana, Agusta Coimali hatete, bainhira moris iha ambiente neebe la favoravel, laos deit iha sosiedade maibe barak liu mak hasoru iha familia uma laran nian. Liu-liu ambiente familia ida neebe mak nakonu ho presaun, la fo suporta moral ba membru familia ka oan neebe hasoru hela problema, maibe buat neebe nia hasoru mak presaun no ameasa iha loron kalan halo nia hanoin barak, too hanoin badak hodi halakon nia vida no buat seluk tan.
Nia dehan, bainhira moris iha ambiente neebe favoravel atu foti desizaun neebe fo risku ba aan no ema seluk, halo ema nee sei hanoin naruk, tanba familia sei hadomi no suporta hela nia. Dala ruma buat sira neebe mos sai fatores halo ema hanoin badak no hanoin negativu hela deit.
“Kazu sira nee akontese tanba fatores barak mak halo ema hanoin badak ba sira nia aan, ida mak ambiente moris neebe la favoravel, problema finanseiru familia no laiha suporta moral husi familia no maluk sira. Ida nee mak dala barak halo ema hanoin la too, hodi deside hili dalan sira neebe ema hotu lakohi atu akontese,” dehan Profesora Eskola CAFÉ Maliana, Agusta Coimali ba STL iha nia knaar fatin, Tersa (30/6/2026).
Nia hatutan, bainhira moris iha familia mak ambiente la favoravel ona, satan sai ba iha sosiedade nia leet. Nee halo nia senti moe no risku boot ida iha nia moris loro-loron. Neebe atu nafatin forsa no korajen hasoru situasaun sira hanesan nee, importante ba ema idak-idak tenke hatoman aan reza, halo orasaun no ba misa iha loron Domingu. Atu nunee fuan boot, pasensia hasoru terus, susar hotu ho kontenti nafatin.
Nunee mos sidadaun Veronica Lopes, nia parte lamenta ho hahalok husi maluk feto sira neebe laiha hanoin hodi soe sira nia oan no tenta oho. Se karik lakohi atu haree bele lori fo ba ema sira neebe oan laiha hodi hakiak, laos tur hanoin barak hodi soe fali oan nee, tanba nia mos ema kriatura Maromak nian hotu.
Nia hatete, hahalok sira nee akontese tanba dala ruma iha uma inan aman sira koalia lakohi rona mak sai nunee. Familia ida neebe mak la hirus, kuandu oan ka subrina ida derepente deit kous bebe no pior liu tan mak aman laiha. Ida nee hanesan lori moe boot ba familia, neebe hakarak lakohi tenke pasensia rona famillia nia liafuan sira, hodi nunee kontinua hakat ba oin ho esperansa foun. Laos halo sala tiha tanba moe, tauk no subar too foti desizaun oho aan ka soe oan neebe la sala buat ida.
Iha sorin seluk, tuir komunidade rede sosial ho naran Familia Bairo da Paz, liu husi beranda tau labarik nia foto no hatete, ohin dader besik tuku 10 iha tasi ibun Bairo da Paz, Tasi-Tolu, joven sira salva labarik feto oan ida ho tinan 3. Neebe hetan estraga husi nia inan iha Tasi ibun bairo refere. Inan nee koko halo mout alin nee no buti iha kakorok alin nian nee hodi hatun ba tasi okos. Agora daudaun alin nee konsege lori mai ona iha responsavel bairo nia uma.
Haree ba situasaun nee Inan Maria de Lourdes hatete, kuitadu tebes inan nee nia fuan kala laiha tebes duni, dala ruma ekonomia atu sustenta oan mak labele ona karik, nee mak nia foti desizaun hodi atu oho fali nia oan nee.
“Sorte labarik joven sira iha tasi iun neeba haree hodi ajuda no salva lalais tiha, se lae kuitadu labarik oan nee kala lakon vida tiha, tanba inan nee nia hahalok. Inan nee kala senti diak karik, nee mak nia halo hanesan nee, nusa la fo ba ema vizinhu ka lori entrega ba madre sira hodi tau matan fodik, tanba sa tenke hili dalan hanesan nee,” dehan nia.
Nia katak, husu ba parte seguransa atu buka tuir inan neebe mai soe nia oan iha tasi ibun Tasi-Tolu, Bairo da Paz nian, hodi responsabiliza ba nia hahalok sira nee. Laos hatene halo tiha oan, depois ikus mai lakohi leba krus no responsabilidade inan nian ho diak, mais tenta fali atu oho oan rasik. Nee hahalok neebe ladiak no krimi, tanba tenta oho duni nia oan rasik maibe sorte ema seluk salva fodik tiha.
(dom)
