DILI, STLTIMORLESTE.com – Primeiru Ministru (PM), Kay Rala Xanana Gusmão akompanha husi Ministra Solidariedade Sosial no Inkluzaun Veronica das Dores, Fila hikas mai Timor Leste (TL) ho Aviaun Citilink, hafoin partisipa iha simeira ASEAN iha Rusia no vizita trabalhu ba Portugal, iha posibilidade atu loke investimentu TL ho Rusia, tanba nee liu husi sorumutu PM Xanana ho Prezidente Rusia loke hela dalan ba Investimentu. Iha okaziaun nee, PM Xanana no comment kona-ba falesimentu Saudozu Francisco Guterres Lu Olo.
Liu husi konfrensia Imprensa iha Salaun VIP Aeroportu Internasional Prezidente Nicolau Lobato Comoro Dili, Tersa (3006/2026) PM Xanana dehan, ohin fila ona mai TL.
“Hau ba ASEAN, ba Cazan Ruria, selebra tinan 35 preparasaun Rusia Asean, iha neeba laos haree ba tinan 35 asean nia laran maibe haree saida maka sei halo iha futuru. Aprosimasaun tinan 2026-2030 atu haree tok, kooperasaun entre ASEAN no Rusia lao oinsa,” dehan PM Xanana.
PM Xanana Dehan, iha Simeira ASEAN, konsege hasoru malu ho Prezidente Rusia, koalia mos posibilidade karik bele, loke investimentu TL ho rai Rusia, tanba nee liu husi sorumutu nee TL-Rusia, loke hela dalan ba investimentu.
“Antes nee, hau simu konvite husi universidade de Lisboa Portugal kleur ona, hau ba simu premiu ida, husi professor Doutor Jorge Miranda, Konstitusionalista boot ida iha Portugal, tanba nee husi Cazan Rusia kedas Lisboa-Portugal,” haktuir PM Xanana.
Nia dehan iha Portugal, aproveita oportunidade ho Ministra Justisa Lucia Lobato neebe inklina aan iha PM nia okos, kona ba reforma justisa nian.
“Iha segunda Feira, Ami hasoru Prezidente Supremu Tribunal Justisa, koalia kona ba sira ajuda TL, depois hasoru tan Retores, Diretores husi universidade Usimigo, Fraga, Lisboa, Portugal, oinsa loke dalan bele ajuda tan ita, hodi forma magistradus ba iha mediu prazu ninian nomos ba futuru, tanba iha TL, ita iha problema kona ba justisa, ita nasaun membru CPLP, maibe ita problema iha dominiu do lingua, infrenta problema laos deit iha setor justisa maibe iha setores hotu-hotu, tanba ita iha konstrusaun estadu,” haktuir nia.
Nia haktuir tan katak, governu TL ninia politika kona ba ekonomia azul, tanba nee PM Xanana partisipa iha konfrensia ida iha neeba.
“Konfrensia nee sira halo iha tinan 4 liu ba, hau partisipa iha neeba iha tinan 2022, iha CPLP ita maka foti ekonomia azul, biodiversidade, tau mos hau iha neeba nuudar prezidente Institutu Diretu do mar ninian, tanba nee 4 konfrensia nee iha tinan 2026, hau tenke partisipa iha konfrensia neeba, koalia uitoan kona ba saida maka ita nia planu kona ba ekonomia azul nee,” haktuir PM Xanana.
Iha biban nee, PM Xanana hatoo agradesimentu ba Primeiru Ministru Interino, Mariano Asanami Sabino.
“Hau agradese ba Primeiru Ministru Interino, Mariano Asanami Sabino, tanba halao serbisu ho diak durante hau la iha TL, agora ita prepara debate orsamentu, tanba nee serbisu barak maka ita sei halo,” dehan nia.
Iha biban nee, Deputada Bendita Moniz Magno, husi bankada Partidu Kongresu Nasional Rekonstrusaun Timorense (CNRT), hanesan visi Sekretaria Meja Parlamentu Nasional, nia akompanhia PM Xanana, iha asuntu prinsipal rua maka tenke halao, ida maka kona ba PM Xanana Sai Prezidente provizoriu CPLP no ida seluk maka reforma setor justisa.
“Hau akompanha PM Xanana ba iha Portugal, iha buat rua maka nia tenke halao, ida maka kona ba TL sai prezidente provizoriu ba CPLP, segundu haree mos kona ba reforma justisa, ida nee atu haree ita nia jurista sira no advogadu sira ou juis sira mos tenke profesiona,” dehan PM Xanana.
Ho vizita PM Xanana ba Rusia no Portugal, espera buat hotu-hotu sei lao ho diak, tanba nee, sei iha rezultu balun husi vizita Xefe Governu iha rai liur.
PM Xanana No Comment Falesimentu Lu Olo
Iha biban nee, perguntas jornalista sira nian kona ba falesimentu Eis Gerileiru, Eis Primeiru Prezidente Parlamentu Nasional, Eis Prezidente da Republika, atual Prezidente Partidu Frente de Revolusionariu Timor Leste Independente (FRETILIN), Francisco Guterres Lu Olo, Primeiru Ministru Kay Rala Xanana Gusmao hili nonok ou no Comment.
PM Xanana too TL iha loron 30 Fulan Junhu tuku 12:30 OTL, iha Aeroportu Internasional Prezidente Nikolau Lobato ho Aviaun Citilink, husi nia vizita ofisial iha Portugal, hili atu la hasai liafuan ruma kona ba Saudozu Lu Olo nia pasajen.
Iha Aeroportu, Primeiru Ministru simu direta husi Visi Primeiru-Ministru, Mariano Assanami Sabino akompanha husi Membru Governu sira inklui Deputadu balun husi Bankada CNRT no Prezidente Tribunal Rekursu, Afonso Carmona no entidade sira seluk. Iha okaziaun nee, PM Xanana komprimenta entidade sira neebe simu. Xanana akompanha husi Visi Primeiru Ministru ho Sekretariu Estadu Komunikasaun Sosial, Expedito Dias Ximenes, atualiza rezultadu vizita ofisial ba Rusia no Portugal.
Iha biban nee, Sekretariu Estadu Komunikasaun Sosial (SEKOMS)Expeditu Dias Ximenes hateten ba jornalista sira katak, relasiona ho falesimentu Saudozu Francisco Guterres Lu Olo PM dehan sei la koalia maibe jornalista sira sei nafatin husu perguntas.
“Ohin hau hateten ona katak, relasiona ho Perguntas jornalista sira nian kona ba falesimentu Saudozu Francisco Guterres Lu olo, PM Xanana sei la koalia maibe o nafatin husu perguntas,” dehan Expeditu Dias Ximenes.
(jos)
