DILI, STLTIMORLESTE.com – Coperativa Cafee Timor (CCT) neebe hetan apoiu husi Governu Nova Zelandia halo ona reabilitasaun ba toos husi komunidade sira nia hamutuk rihun 12.
Lia hirak nee hatoo husi Jerente CCT, Felisberto Fereira Pinto ba jornalista sira iha Palasiu Prezidensial Nicolau Lobato, Bairo Pite, Kuarta (01/07/2026).
Nia hatete, CCT neebe hetan apoiu husi Governu Nova Zelandia halo ona rehablitasaun toos husi komunidade hamutuk rihin 12.
Jerente CCT dehan, iha enkontru nee Prezidente Republika mos husu atu reabilita, tanba bainhira prezidente simu pose halo kampanha boot konaba reablitasaun kafee, momentu CCT mos inklui mos iha laran iha Railaku, Ermera depois ida nee VIII Governu aloka osan intensivu ba agrikultor sira hodi halo reabilitasaun maibe VIII Governu muda tiha ba IX Governu, programa nee la kontinua, maibe CCT hetan ajuda husi Nova Zelandia kontinua nafatin halo reabilitasaun husi 2021 too mai 2025.
“Husi 2021 too mai 2025 CCT hetan ajuda husi Nova Zelandia, CCT reabilita ona hamutuk rihun 12 neebe membru sira nia toos reablita ona, reabilita katak tesi sira nia kafee tuan hadia kafee mahon neebe tuan ona kuda kafee oan foun,” katak nia.
Nia hatutan, durante nee sira reabilita kafee nee iha Munisipiu Ermera, Likisa, Aileu, Ainaro no Same, depois apoiu husi Governu Nova Zelandia liu husi embaixada iha Timor Leste, laos deit ba reabilitasaun.
“Ajuda husi Governu Nova Zelandia liu husi nia embaixada iha Timor Leste laos deit ba reabilitasaun ba kafee deit maibe sira mos ajuda ba dezenvolvimentu Kakau, Pimenta, Cengkih no Vanila, ajuda para CCT produs aihoris sira nee hodi distribui ba membru sira neebe mak iha Munisipiu Lauten, Viqueque, Baucau, Ermera, Likisa, Manufahi, Covalima no Bobonaro,” katak nia.
Nia hatutan, iha 2026 nee grasa Maromak nia Governu Nova Zelandia extende tan ninia ajuda, lolos nee remata iha 2025 maibe iha janeiru 2026 estende tan too 2027, entaun iha planu ba reabilitasaun nee tinan ida nee CCT sei reabilita toos hamutuk rihun 2 nomos sei fahe kakau oan rihun 100, kafee oan rinun 100 ho pimeta no Cengkih no vanila hamutuk rihun 50.
Nia hatutan, tuir tarjeitu ba Governu Nova Zelandia ba reabilita iha munisipiu 9 mak hanesan Lauten, Viqueque, Baucau, Manufahi, Covalima, Bobonaro, Ermera, Likisa no Aileu.
Iha biban nee Prezidente Republika Jose Ramos Horta husu CCT atu preparasaun oinsa mak hasoru El Nino neebe sei mai, tanba mudansa klimatika nee fo impaktu ba iha mudansa produsaun kafee, no CCT mos iha hanoin ona oinsa atu introdus kafee Timor maibe tekniku sira halo preparasaun hodi hasae produsaun.
Prezidente mos husu CCT atu aumenta produsaun kafee, nunee bele halo esportasaun ba iha nasaun seluk.
(eme)
