BAUCAU, STLTIMORLESTE.com – Autoridade Suku tolu iha Postu Administrativu Baguia, foti desizaun konjunta koordena ho komunidade sira atu halo kontribuisaun osan normaliza estrada neebe durante nee kotu total iha area Basarauai, Suku Hae-Coni, Postu Baguia, Munisipiu Baucau.
Xefe Suku Ossohuna, Paulo dos Reis Piedade aprezenta, iha loron 01 Julhu nee Autoridade Suku Hae-Coni, Ossohuna no Afaloicai hamutuk realiza reuniaun konjunta hodi husu komunidade husi suku tolu refere nia kontribuisaun inklui emprezariu no individu Baguia oan neebe iha interese atu apoia material no orsamentu atu hadia hikas fali estrada refere, neebe durante nee kotu total iha Basarauai, ho objetivu atu fasilita movimentasaun transporte.
“Ohin ami deside hamutuk husu kontribuisaun osan husi komunidade hodi ense mina ba kareta neebe oferese voluntariamente,” hatete Paulo dos Reis Piedade ba jornalista sira liu husi telefone, Kuarta (01/07/2026).
Nia esplika, apoiu dahuluk atual iha terenu hetan bronzon husi kompanhia internasional neebe responsavel ba projetu reabilitasaun estrada Laga-Baguia hamutuk unidade hitu nomos bronjon lima seluk hetan apoiu husi Autoridade Suku Samalari, Postu Baguia.
Nia sublina, komunidade sira mos balu apoiu material lokal hanesan fatuk karada 10 inklui servisu kooperativa entre komunidade sira husi suku tolu refere nia kontribuisaun orsamentu, nunee aloka ba mobilizasaun material ba normaliza pasadera iha area neebe estrada kotu, maibe kontribuisaun la ezije, maibe fo tuir ida-idak nia konsiensia.
“Fila ba konsiensia kada pesoal, la ezije valor osan no tipu kontribuisaun, importante apoiu neebe fo relevante hodi hadia estrada nee,” Paulo argumenta.
Nia komenta, desizaun konjunta refere sei divulga liu husi meus komunikasaun iha rede sosial hanesan Grupu WhatsApp, Igreja, Facebook no media hodi hetan atensun husi komunidade Baguia oan sira neebe hakarak apoiu. Tanba durante estrada refere kotu difikulta movimentasaun transporte durante fulan rua resin, iha neebe fo impaktu ba komunidade agrikultores sira nia rendimentu hodi sustenta ekonomia familia.
Aleinde mos durante nee implika servisu publiku sira, tanba tranporte ambulansia labele too Suku Afaloicai no Osaohuna tula pasiente ba Hospital Rejional Eduardo Ximenes Baucau.
“Kontinuasaun nee ezijensia husi komunidade no husu atu hamutuk hadia fali estrada nee hodi fasilita ami nia movimentasaun,” Paulo akresenta.
Enkuantu estrada diresaun Baguia Vila ba Suku tolu kotu iha area Basarauai ho distansia metru sia resin kotu iha loron 13 Maiu 2026, kauza husi udan boot.
Entretantu estrada diresaun husi Baguia Vila too iha Suku Afaloicai hamutuk kilometru 10 resin fo asesu ba populasaun husi Suku 4 hamutuk nain 7.745, kompostu Suku Afaloicai ho populasaun hamutuk nain 1.639, Alawa Kraik nain 1.934, Hae-Coni nain 2.807 no Ossohuna iha populasaun hamutuk nain 1.365.
(tom)
