DILI, STLTIMORLESTE.com – Membru Polisia Nasional Timor Leste (PNTL) uza arma estadu tiru aan, ida nee iha ninia prosedimentu, tanba kada tinan sira iha referensia training, kada tinan fulan 6 sira ba refresing training, ba neeba balu tuir tes tiru, depois iha neeba halo avaliasaun merese atu kaer kilat no balun la merese kaer kilat, realidade polisia balun la iha kilat, tanba sira falha iha prosesu tiru.
Tuir Ministru Interior, Francisco da Costa Guterres iha Palasiu Governu hafoin halao enkontru Konselhu Ministru, Kuarta (01/07/2026) katak, membru PNTL neebe utiliza arma nee, ninia prosedimentu iha, foin lalais akontese polisia tiru aan nee, ida nee kestaun psikolojia nee laos ligasaun ona ho sira nia serbisu nee, liga ho kestoens privadu.
“Kestaun privadu nee, buat hotu iha idak-idak nia vida, ita labele koalia, maibe kestaun privadu, ita labele fo sala fali ba iha kestaun prosedural instituisaun ninian nee, tanba sira kumpri hela, sira iha neeba mos teste nafatin, ba tuir treinu ou formasaun nee sempre iha, depois haree nafatin sira nia mentalidade, sira neebe uza kilat bo-boot nee, sempre ba aprezenta sira nia aan, depois haruka sira ba tiru, halo avaliasaun spikolojia, ida nee sempre iha. Hau hanoin foin lalais ita nia Senhora Polisia Feto ida, oho aan nee, hau hanoin la iha ligasaun ho prosedurais serbisu PNTL ninian, ida nee liga ho kestaun privadu ninian bain hira halo investigasaun,” dehan Ministru Interior.
Iha biban nee, Ministru Interior mos simu ona relatoriu preliminariu ba kazu feto polisia tiru aan foin lalais nee.
“Hau simu ona relatoriu preliminariu ida kona ba kazu feto polisia tiru aan foin lalais nee, hau seidauk bele koalia sai tanba kestaun ligasaun ho kestaun privadu balun, mais ita haree kazu tiru aan nee, ida nee kestaun seluk ida, tanba nee apela bebeik ba membru sira hotu-hotu, ita tenke kuidadu, iha problema, hakat mai komandu hodi ita rezolve no hakat mai tenke berani koalia sai, para expresa sai ba nia komandante, para buka solusaun ba ida nee, laos ho meus oho aan uza kilat estadu,” dehan Ministru.
Responde kona ba preokupasaun sosiedade civil sira neebe kestiona kona ba arma neebe polisia uza iha tempu serbisu, kuandu remata ona tenke tau iha komandu nia fatin katak, regras no presedimentu nee iha hotu ona, misaun remata iha tempu serbisu tenke tau ona arma nee iha nia fatin, atu fila ba uma laos uza ona kilat.
Tuir Portavoz Polisia Nasional Timor Leste (PNTL), Superintendente Xefe Polisia, Joao Belo hatete, kazu neebe membru Polisia ida tiru aan nee PNTL rejistu ona ho numeru NUC 0226/2026 PNSIK.
“Agora dadaun nee ami seidauk aprezenta ba Ministeriu Publiku, tanba ami sei rekolha tan dadus no informasaun balun hodi halo klean liu tan faktus neebe ami aprezenta ba Ministeriu Publiku,” dehan Portavoz Polisia Nasional Timor Leste (PNTL), Superintendente Xefe Polisia, Joao Belo ba jornalista sira liu husi Konferensia imprensia iha Komjer Dili, Tersa (30/06/2026).
Nia esplika, Matebian Ajenti Prinsipal Polisia Engracia Purificação neebe oho aan, nia kazu sei ba oin no rejultadu autopsia hotu ona iha semana kotuk liu ba, mate isin hakoi ona, maibe PNTL persiza tan informasaun adisional balun hodi aprezenta ba MP.
“Ita labele hatete sai lai, tanba saida mak oho aan, tanba prosesu Investigasaun sei lao hela,” nia deklara.
Tuir Xefe Mortoariu Hospital Nasional Guido Valadares (HNGV), Nilton Tilman koalia, mate isin dadaun nee iha sala Mortoariu deside hodi kalan kedas, ohin dadersan seidauk bele autopsia tanba karta pedidu husi Fronsik.
“Maibe agora loraik nee hahu autopsia ona no ita sei entrega kedas ba familia no Instituisaun PNTL,” nia informa.
Nia afirma, matebain hodi kalan iha sala Emerjensia depois lori fali mai iha sala Mortoariu atu halo prosesu autopsia, tanba dekonfia oho aan.
(jos)
