DILI, STLTIMORLESTE.com – Komandante Autoridade Protesaun Civil (APC), João da Silva Sila ho ekipa Bombeirus, Cruz Vermelha Timor Leste oferese apoiu emerjensia hanesan ai-haan nomos non ai-haan ba familia ida hetan insendiu iha Bairru Buneo, Aldeia Faotbijae, Suku Bobocase, Postu Administrativu Pantemakassar Rejiaun Administrativu Espesial Oecusse-Ambeno (RAEOA).
Komandante APC, João da Silva Sila ba STL via Telefone dehan, nia ho ninia ekipa foin maka halo intervensaun fornese apoiu emerjensia ba inan ida ho nia katuas oan neebe idade abansadu ona, hela hamutuk iha sira nia uma, derpenti hamosu insendiu iha sira nia uma, iha loron Tersa (30/06/2026), meudia.
“Ita mantein apoiu emerjensia, liga ho dezastre neebe maka akontese iha RAEOA, liu-liu iha Suku 20 iha Oecusse. Dadus neebe rekolha husi familia vitima ho tipu dezastre oi-oin iha Oecusse hanesan insendiu, Inundasaun, anin boot sobu uma, hamutuk 237 inklui insendiu iha Bairru Buneu, hahu husi fulan Janeiru atu ohin loron, ita konsege apoiu ona pakote ba familia vitima. Hau foin mai husi fatin akontesementu insendiu neebe akontese iha loron horseik, insendiu akontese iha Aldeia Faotbijae,” dehan Komandante APC RAEOA, João da Silva Sila.
Nia haktuir tan katak, kronolojia husi insendiu iha Bairru Boneu, tanba avo feto ho avo mane, sira nain rua nuudar idozus neebe hela hamutuk iha uma nee, bain hira sira tein iha uma kabuar nee, sira haluha hamate ahi iha uma laran, entaun anin ho velosidade makaas, huu ahi neebe sira tau iha uma laran, lakan sai boot iha meudia, entaun ahi han hotu sira nia uma hela fatin.
Iha biban nee nia hatoo ba publiku katak, lori governu nia naran liu husi APC neebe toma responsabel ba dezastre naturais, apela nafatin ba komunidade atu bele mantein ho responsabilidade katak dezastre ema hotu la espera no karik sente katak, fatin neebe hela ba nee, risku ba dezastre, diak liu dook husi fatin neeba hanesan ai hun boot sira, rai lolon sira no tenke kuidadu mos tanba tempu bailoron anin ho velosidade makaas, tein aihan karik tenke kuidadu aan hodi hadook aan husi dezastre.
Kona ba formasaun nee iha Oecusse, husi APC fo formasaun iha suku Cunha iha aldeia Sonamnasi, Postu Administrativu Pantemakassar, depois iha suku Ban Afi Postu Administrativu Nitibe kobre aldeia tomak.
Relasiona ho programa APC iha Oecusse, oras nee dadaun halao formasaun ba prevensaun no mitigasaun, durante nee mos husi APC Nasional mai fo formasaun iha Oecusse, nunee mos membru APC RAEOA mos ba tuir formasaun iha Nasional.
Iha biban nee, Jacobus Colo nuudar oan husi ninia aman idozu Thomas Colo sente triste ho insendio neebe akontese ba ninia aman ho ninia inan kiik neebe ahi han hotu sira nia uma iha Bairru Buneo.
“Hau nuudar oan sente triste maibe atu dehan saida, buat dezastre ita la espera tanba akontesimentu nee hau mos la hatene, dadersan hau ba toos, sira nain rua hau nia inan maka hela mesak iha uma nee ho ninia bee oan sira maibe sira ba eskola, derpenti anin makaas no uma ho sasan iha uma laran la aproveita, ate hau nia aman Tomas Colo mos ahi han nia isin, sorte maluk Ermino Ena maka rona sira haklalak, nia foin fila husi merkadu Maumate maka ba salva sira nain rua, maibe sasan la aproveita ona,” dehan Jacob Colo.
Iha biban nee, nia hatoo obrigado wain ba governu liu husi APC neebe maka hamutuk ho Xefe Suku Bobocase, Tomas Nesi, oferese apoiu emerjensia ba sira.
(jos)
