DILI, STLTIMORLESTE.com – Primeiru Ministru (PM), Kay Rala Xanana Gusmão hatete, xina sei apoiu halo konstrusaun Hospital Amizade Timor Leste (TL) – Xina, nunee bele prevene labele lori moras sai ba rai liur.
Primeiru Ministru Kay Rala Xanana Gusmão hatoo lia hirak nee ba jornalista sira, bainhira remata halo enkontru semanal ho Prezidente Republika Jose Ramos Horta iha Palasiu Prezidensial Nicolau Lobato, Bairo Pite, Kinta (02/07/2026).
Primeiru Ministru hatete, Hospital Amizade TL-Xina sei harii besik iha Ministeriu Defeza no Kuartel Jeneral F-FDTL, iha Dili.
“Hau mai informa ba Prezidente konaba vizita, Rusia, Portugal, dehan mos ba Prezidente katak horiseik iha Konselhu Ministru ami konkorda ho oferta ida husi Xina atu halo iha kuartel Jeneral Ministeriu Defeza nia kotuk Hospital Militar de Amizade ida, sira halo tiha depois mak kordena diak ho Ministeriu Saude liu liu atu prepara ita nia doutor sira hodi evita ita haruka beibeik moras sira ba Malazia,” dehan PM Xanana.
Primeiru Ministru hatete, remata halo hospital sei prepara mos doutor sira oinsa bele halo tratamentu ba komunidade sira, maibe buka atu prepara doutor sira mais buat nee la fasil.
“Nee duni mak ita sei haree tok tanba bainhhra tama Julhu 2023 dividas deit ba haruka husi VIII Governu ema ba liur 28 milhões, IX Governu mak selu oituan oituan,” katak PM Xanana.
Primeiru Ministru hatete, Xina mak oferese, apoiu halo Ministeriu Negosiu no Ministeriu Defeza mos Xina mak oferese, tanba nee oferese tan atu halo Hospital Militar de amizade ida.
Aleinde nee Primeiru Ministru mos hatete, mai informa ba Prezidente Republika konaba vizita Primeiru Ministru Singapura mai Timor Leste.
“PM Singapura ohin atu mai neebe agora hau ba Ministeriu Negosiu Estranjeiru ba haree programa nee saida, ami aban koalia karik ho Primeiru Ministru Singapura tanba nia iha ASEAN nia laran iha ona kontaktu ho Ministru sira, Ministeriu sira kooperasaun buat sira nee hotu, ho ida nee mak hau bele informa,” katak PM Xanana.
Iha kuarta horiseik (01/07/2026) liu husi reuniuan Konselhu Ministru, Ministru Defeza, Donaciano do Rosario Gomes halo aprezentasaun ida ba Konselhu Ministru kona-ba projetu konstrusaun ba Hospital Militar FALINTIL-Forsa Defeza Timor Leste (F-FDTL) nian, neebe dezenvolve iha ambitu kooperasaun bilateral entre TL no Repúblika Popular Xina.
Iha aprezentasaun nee, misaun teknika xineza neebe responsavel ba sevisu preparasaun ba projetu nee aprezenta karakterístika prinsipal ba futuru Hospital Amizade TL-Xina, neebe sei harii besik iha Ministeriu Defeza no Kuartel Jeneral F-FDTL, Dili. Projetu nee inklui hospital jeral ida ho kapasidade kama 100, area maizumenus metru kuadradu 10.500, edifísiu prinsipal ida ho andar ualu, no mos edifísiu apoiu sira, neebe kompleta ho teknolojia medika moderna no preparadu atu fornese servisu konsulta esterna, kuidadu emerjensia, internamentu, imajiolojia, analizes klínikas no kuidadu intensivu. Halo mos aprezentasaun ida konaba kriasaun Komisaun Interministeria ida hodi halo supervizaun no akompanamentu ba Konstrusaun Futuru Ospital Militar nian.
Projetu estratejiku ida-nee ho objetivu atu reforsa kapasidade operasional F-FDTL, komplementa servisu sira Servisu Nasional Saude nian, hadia resposta ba emerjensia, katastrofe no krize umanitaria, promove formasaun no dezenvolvimentu medisina militar, hamenus dependensia ba tratamentu sira iha rai liur, no mos fo benefísiu ba populasaun sivíl, hodi kontribui ba reforsu kapasidade nasional iha area saude no dezenvolvimentu ekonomiku nasaun nian.
(eme)
