DILI, STLTIMORLESTE.com – Primeiru Ministru (PM), Kay Rala Xanana Gusmão hatete, Governu aprova karreira espesial no estatutu guarda prizional nian atu hadia buat neebe lalos.
Primeiru Ministru Kay Rala Xanana Gusmão hatoo kestau nee ba jornalista sira, bainhira remata halo enkontru semanal ho Prezidente Republika Jose Ramos Horta iha Palasiu Prezidensial Nicolau Lobato, Bairo Pite, Kinta (02/07/2026).
“Guarda Prizional kleur ona mak nafatin hela deit, nee mak horiseik aprova tiha estatutu foun imi sei lembra katak husi polisia mos kleur katuas hotu ona mos mak nunee nafatin, foin daudaun tinan kotuk mak ita aprova halo promosaun,” katak PM Xanana.
Primeiru Ministru hatete, Governu aprova karreira espesial no estatutu guarda prizional nian. Governu iha hanoin oinsa hadia Gurda Prizional nomos seluk tan.
“Neebe ita hakarak hadia, hadia para ladehan katak selu deit lae haree tuir nia halo diak selu halo ladiak sai neebe buat sira nee hotu mak ami haree hela agora nee prepara ba aban,” katak PM Xanana.
Konselhu Ministrus halao sorumutu iha Palasiu Governu, Dili, no aprova projetu dekretu-lei, neebe aprezenta hosi Ministru Justisa, Sergio de Jesus Fernandes da Costa Hornai, kona-ba alterasaun dahuluk ba Dekretu-Lei n. 10/2012, loron 29 fulan-fevereiru, neebe aprova karreira espesial no estatutu guarda prizional nian.
Objetivu husi diploma ida-nee atu halo revizaun ba rejime Kareira Espesial no Estatutu Guarda Prizional, neebe vigora desde 2012, ho objetivu atu esklarese regras ba promosaun karreira, valoriza guarda prizional no reforsa efikasia sistema prizional nian.
Entre mudansa prinsipal sira neebe prevee iha diploma ida-nee maka kria kategoria Xefe Guarda Prizional Prinsipal, revee regras promosaun, aumenta komplementu remuneratoriu ba 50% husi salariu baze, fo direitu ba refeisaun durante turnu servisu, no mos kria rejime promosaun exesional bazeia ba antiguidade ba guarda prizional sira neebe mantein iha eskalaun ikus hosi sira-nia kategoria durante tinan ualu liu, naran katak sira kumpre rekizitu legal sira. Diploma nee mos introdus ajustamentu ba rekrutamentu, formasaun no ezersísiu funsaun xefia nian.Ho revizaun ida-nee, nia objetivu mak atu rekonese meritu no dedikasaun guarda prizional sira nian, kria kondisaun diak liutan ba progresaun sira nia karreira no kontribui ba hadia seguransa no kualidade servisu neebe presta iha estabelesimentu prizional sira.
Projetu dekretu-lei ida-nee hetan ona deliberasaun iha sorumutu konsellu ministrus iha loron 13 fulan-marsu tinan 2024. Maibe, tuir ajustamentu sira neebe mak introdus iha faze redasaun final, liuliu atu armoniza rejime remuneratoriu, prevee direitu ba refeisaun durante turnu servisu, no estabelese rejime tranzitoriu ida ba promosaun estraordinaria, presiza reavaliasaun no deliberasaun foun ba Projetu Dekretu-Lei ida nee.
(eme)
