DILI, STLTIMORLESTE.com – Ministru Transporte no Komunikasaun (MTK), Miguel Marques Manetelu responde preokupasaun povu Oecusse neebe durante nee kontinua simu karta kondusaun provizoriu, daudaun orienta ona ekipa tekniku sira husi Diresaun Nasional Transporte no Terestres (DNTT) atu prepara makina emprime hodi produz karta kondusaun orijinal.
Informasaun nee Ministru hatoo iha Palasiu Governu hafoin halao enkontru Konselhu Ministru (KM), iha loron Kuarta (01/07/2026) katak, haruka ona ekipa atu haree makina emprime karta kondusaun no daudaun sira iha ona Oecusse.
“Hau orienta ona ekipa tekniku haree makina produs karta kondusaun orijinal iha Oecusse, tanba nee tempu badak sei halo lansamentu ba makina emprime karta kondusaun orijinal,” dehan ministru.
Relasiona ho kestaun makina emprime karta kondusaun orijinal iha Oecusse, Diretor Servisu Rejional Transporte no komunikasaun RAEOA, Domingos de Almeida dehan, makina Emprime kartaun orijinal sei iha hela prosesu.
“Hau labele promete katak makina emprime karta kondusaun, iha hela prosesu, tanba nee tinan nee Governu Autoridade RAEOA, tau osan boot uitoan hodi haree kestaun nee, dadaun iha prosesu tenderizasaun ba kompanhia hodi prepara ekipamentus sira nee,” dehan nia.
Antes nee Diretor Diresaun Nasional Transporte no Terestres (DNTT), Maria Antonia iha Eskola Sekundaria Jeral Palaban Oecusse dehan, daudaun nee kria ona kondisaun atu emprime karta kondusaun Orijinal.
“Agora Diresaun Transporte no Komunikasaun Oecusse tutela ona ba DNTT, tanba nee tempu badak ita sei emprime karta kondusaun orijinal iha Oecusse,” afirma nia.
(jos)
