DILI, STLTIMORLESTE.com – Vitoria dramatika Selesaun Nasional Portugal ho skor 2-1 hasoru Kroasia iha faze 32 Kopa Mundial 2026, hamosu reasaun oi-oin husi adeptu sira iha Timor Leste. Maski parte barak kontente tanba Portugal konsege tesi liras Korasia nian hodi sae ba faze eliminasaun 16, maibe parte seluk hamosu mos diskusaun manas tanba desizaun Video Assistant Referee (VAR), iha minutu ikus sira neebe halo adeptu husi ekipa nasional balu la simu realidade.
Iha kapital Díli no Munisipiu sira, dadersan nee animadu kedan ho movimentu haksolok husi motor no kareta hodi selebra golu desizivu neebe mai husi Gonçalo Ramos iha minutu 94. Vitoria kmanek nee nuudar pasu importante tebes hodi lori Cristiano Ronaldo ho ninia kolega sira hakat ba oin iha dezafiu boot nee.
Jogu neebe halao iha Toronto stadium, Kanada, lao ho tensaun aas tebes, Korasia hatama uluk golu liuhusi Ivan Perisic iha minutu 53, maibe kapitaun Cristiano Ronaldo konsege empat fali eskor liuhusi penalti iha minutu 68 hodi sikat fali espetetiva adeptu sira nian. Ronaldo mos foti titlu nuudar jogador maduru liu neebe konsege hatama golu iha faze eliminasaun kopa nian.
Maski vitoria nee lori haksolok boot, maibe lalaok jogu nian hamosu diskusaun neebe seidauk hotu iha media sosial no komunidade laran. Adeptu Korasia nian iha Timor-Leste, inklui mos adeptu nutral balu la simu realidade ho disizaun arbitru nian neebe ka sela golu empata husi Josko Gvardiol iha minutu estra (90+14) tanba VAR deklara katak Mario Pasalic iha posizaun offside.
“Ami kontente tebes ho rezultadu Vitoria, maibe desizaun VAR ikus nee lori tensaun boot. Market offiside neebe kiik tebes halo adeptu balu la simu realidade no susar tebes atu simu rezultadu nee,”dehan adeptu Portugal iha TL, Martinho Sarmento ba STL, iha Bairru Pite, Dili, Sesta (03/07/2026).
Nia dehan, emosaun neebe mosu iha jogu nee hatudu deit katak entuziasmu ba futebol iha Timor-Leste boot tebes, maske dala balu susar atu simu desizaun tekniku sira VAR foti iha minutu ikus.
Iha parte ketak Observador Futebol, Luciano da Costa konsideira katak polemika konaba desizaun VAR nee nuudar buat neebe labele evita iha futebol modernu, tanba teknolojia mai hodi garante lalaok neebe tuir regra mos, maske dala balu foti desizaun naruk neebe hamate emosaun temporariu husi adeptu sira.
Entretantu ho rezultadu diak nee, Portugal ofisialmente hetan kedas bilhete hodi hein fali parte tuir mai hasoru Espanha, iha faze eliminasaun 16 neebe sei halao iha loron 6 julhu tuir mai, enkuantu emosaun husi jogu sei kontinua sai topiku diskusaun boot iha sidade laran.
(car)
