DILI, STLTIMORLESTE.com – Prezidente Republika (PR), Jose Ramos Horta kondekora Kolara Ordem Timor Leste (TL) ba Primeiru Ministru Singapura, Lawrence Wong, iha Palasiu Prezidensial.
Prezidente Republika Jose Ramos Horta liu husi nia diskursu iha Palasiu Prezidensial Nicolau Lobato, Bairo Pite, Sesta (03/07/2026) hatete, ho orgulhu simu Primeiru Ministru Singapura, Lawrence Wong nia vizita mai TL hodi hametin relasaun rai rua, iha vizita nee Prezidente Republika rekonhese no kondekora ho Kolar da Ordem de TL ba Primeiru Ministru Singapura.
“Ohin, iha Salaun Xina nian, hau nia onra atu fo ba Primeiru Ministru Singapura, Lawrence Wong Grande Colar da Ordem de TL, onra aas liu ba ita nia nasaun,” dehan Primeiru Ministru.
Prezidente Republika hatete, premiu nee rekonese nia kompromisu makaas hodi hametin amizade no kooperasaun entre Singapura no TL. Iha nia lideransa nia okos, relasaun bilateral avansa makaas no partikularmente iha dezenvolvimentu institusional, kapasidade rekursu umanu no integrasaun rejional TL nian.
“Hau fiar katak vizita ida nee sei loke kapítulu foun sira neebe emosionante iha ita nia relasaun bilateral sira no hametin liu tan amizade entre ita nia nasaun sira no ita-nia povu,” katak PR Horta.
Iha biban nee Primeiru Ministru Singapura, Lawrence Wong hatete ho laran haksolok simu kondekorasaun nee ho umildade no gratidaun boot, no promete kontinua apoia dezenvolvimentu TL.
Primeiru Ministru Singapura hatete, simu kondekorasaun nee laos ba nia aan rasik, maibe ba Singapura no povu Singapura sira neebe kontribui ba amizade entre nasaun TL ho Singapura, no mos povu TL neebe simu sira ho amizade, jenerozidade no bondade.
PM Singapura dehan, Singapura akompanha TL iha etapa oi-oin ba konstrusaun nasaun liu husi kooperasaun teknika, dezenvolvimentu kapasidade no troka esperiensia entre povu rua. No Singapura kontinua kompromete atu apoia dezenvolvimentu no susesu TL.
Liga ho adezaun TL ba ASEAN, Wong konsidera ida nee hanesan kapitulu foun importante ba TL, ba ASEAN no relasaun entre nasaun rua no garante katak Singapura hakarak servisu hamutuk ho TL atu promove dame, estabilidade no prosperidade iha rejiaun.
“Premiu nee laos deit rekonhesimentu ba ema ida idak. Ida-nee hanesan omenajen ida ba ema Singapura barak neebe ajuda ona harii lasu amizade neebe klean entre nasaun rua. Ligasaun sira hahu, mezmu TL hetan independensia,” dehan Primeiru Ministru Singapura.
Nia hatutan, daudaun reafirma Singapura nia kompromisu atu ajuda sai lejítimu liu tán. Harii kapasidade umana, ida nee presiza, Singapura hakarak estadu maizumenus atu buras no hetan susesu nuudar membru ida husi familia ASEAN, no hein ninia kontribuisaun pozitivu sira ba ASEAN.
(eme)
