DILI, STLTIMORLESTE.com – Selesaun Nasional Norwegia konsege hamosu supreza boot hodi halakon Brasil ho skor dramatiku 2-1 iha jogu oitavu final Kopa Mundial 2026, neeebe halao iha New York Jersey Stadium. Avansadu Eling Haaland sai nuudar jogador xave liu husi golu rua neebe harahun mehi Brasil nian, enkuantu estrela Neymar Jr, la konsege subar ninia tristeza no tanis wainhira apitu ikus huu.
Derrota nee nuudar rezultadu foun neebe la diak ba Selesaun Brasileira, tanba nee mak foin ba dala primeiru sira lakon iha faze oitavu final nian dezde Kopa Mundial Italia 1990. Enkuantu ba Norwegia, vitoria nee lori sira avansa ba kuartu final hodi hein manan nain hosi jogu entre Mexiku no Inglatera.
Jogu iha primeiru lao manas tebes maibe termina ho eskoru mamuk 0-0. Brasil hetan duni oportunidade osan mean hodi lider uluk iha minutu 14 wainhira arbitu fo penalidade liuhosi review VAR ba falta neebe Kristoffer Ajer halo. Maibe xute hosi Bruno Guimarães konsege hetan defeza espetakuler husi guarda redes Norwegia nian.
Iha parte daruak, treinador Carlo Ancelloti hatama Neymar Jr, iha minutu 67 hodi troka Gabriel Martinelli ho objetivu atu aumenta kbiit atake nian. Maske nunee, Norwegia mak hatudu fali efisiensia neebe aas tebes.
Iha minutu 79, Andreas Schjelderup fo kruzamentu furak hosi liman karuk neebe hetan kedas Erling Haaland. Ho ninia kbiit fiziku, Haaland foti bola ho ulun hodi duni Alison Becker no hamosu golu primeiru.
Minutu sanulu tuir mai, iha minutu 90 Haaland hatudu fali ninia kbiit ho xute ka tebe makas hosi liur area penalidade nian, neebe liu hosi ain Gabriel Magalhães nian hodi hamate duni esperansa Brasil nian ho eskoru 2-0.
Wainhira arbitu Ismail Elfath huu apitu final, Neymar Jr, neebe foin hatama golu penalidade iha minutu 90+10 la konsege kontrola ninia emosaun hodi tur kedas iha kampu laran ho mata been nakonu. Tristeza neebe mosu hosi ninia oin hatudu duni ninia laran triste, tanba maske foin deit rekupera hosi kanek naruk hodi tama fali nuudar jogador substitutiu, ninia esforsu tomak la too duni atu salva Brasil husi eliminasaun hodi halo Kopa Mundial nee sai nuudar mehi neebe harahun fali ba ninia kareira internasional.
Triste derrota nee laos deit sente iha estadiu laran, maibe habelar mos too adeptu fanatiku Selesaun Brasil nian iha Timor Leste. Adeptu hosi Díli, Marcelino Moreira fo ninia komentariu hodi espresa ninia laran moras haree rezultadu nee. ”Nuudar adeptu husi tinan ba tinan, laran moras tebes kuandu haree fali Neymar tanis hanesan nee. Brasil lakon konsentrasaun iha fali lina kotuk no fo espasu boot ba Haaland atu hatama golu iha minutu ikus sira. Ida nee lisaun boot ida, maibe nuudar adeptu, laran metin nafatin ba futuru,” hatete Marcelino ba STL, Segunda (06/07/2026).
Adeptu nee hatutan, maske lakon iha oitavu final, nia fiar katak Konfederasaun Futebol Brasileira presiza halo reestruturasaun tomak ba ekipa teknika no fo oportunidade barak liu ba jogador foinsae sira hodi prepara ba kompetisaun sira tuir mai.
Aleinde nee, derrota nee mos hamosu komentariu oioin husi adeptu no haters sira iha media sosial, liu-liu iha plataforma Facebook. Membru husi komunidade dijital balu hatudu sira nia solidariedade no fo apoiu ba Neymar Jr.
Enkuantu parte seluk, liu-liu grupu opozitor ka haters, uza oportunidade nee hodi kria boneku no kbiit gozu dijital, hamutuk ho kritika makas ba perfomansa Selesaun Brasil nian neebe sira konsideira la tuir espetativa iha Kopa Mundial ida nee.
(car)
