DILI, STLTIMORLESTE.com – Embaixador Timor Leste (TL) ba Mocambique, Luis Miguel Lopes de Sousa Sequeira relata progresu sevisu ba Prezidente Republika (PR), Jose Ramos Horta.
Bainhira remata hasoru malu, Embaixador TL ba Moçambique, Luis Miguel Lopes de Sousa Sequeira ba jornalista sira iha Palasiu Prezidensial Nicolau Lobato, Bairo Pite, Segunda (06/07/2026) hatete, ohin mai relata progresu servisu neebe halao durante nee ba Prezidente Republika, Jose Ramos Horta.
“Ohin ami mai halo enkontru ho sua exelensia Prezidente Republika, objetivu husi enkontru nee primeiru hau nuudar embaixador ba Moçambique relata ba sua exelensia Prezidente Republika sobre servisu embaixada nian, sobre hau nia misaun iha neeba,” dehan Embaixador TL ba Moçambique.
Alende nee embaixador mos lori kompanhia husi Xina, neebe durante nee halo investimentu iha Moçambique tinan 20 ona mai hasoru malu ho Prezidente Republika, antes mai investor sira nee ba koalia ho embaixador, no embaixador mos halo peskiza ida konaba investor sira nia kompanhia no embaixador mos hasoru embaixadora Xina.
“Sira nia embaixadora mos dehan sira nia kompanhia mos boot ida, no hau vizita fatin sira nia obra neebe sira halo ona, depois hau foti inisiativa para lori sira mai, ami too horiseik primeiru dia deit hasoru malu ho Prezidente Republika, orsida sei hasoru mos visi Primeiru Ministru depois ho membru Governu,” dehan Embaixador.
Embaixador dehan, investor sira mai Timor Leste objetivu primeiru mai haree hanesan oportunidade hodi konhese liu tan ambiente atu halo negosiu hodi haree saida mak sira bele halo iha Timor.
Signifika katak, embaixador lori investor sira husi Xina mai aprezenta ba Prezidente Republika nomos Governu? hatan ba kestaun nee Embaixador hatete, sim no sira manifesta sira nia intrese atu investe iha Timor, no sira halo investimentu laos iha Moçambique deit maibe iha Angola mos iha, no iha Moçambique sira halo minerasaun iha parte norte no sira mos halo mos Hotel.
“Pesoalmente hau rasik ba vizita hotel neebe sira halo nee aban bainrua sei sai icom iha Moçambique, halo mos infraestrutura fabrika semente, tanba nee mak sira hakarak mai manifesta sira nia intrese atu investe iha Timor,” dehan nia.
Nia hatete, investor sira nee sei hasoru malu ho Visi Primeiru Ministru, no investor sira nia parte prontu atu halo investimentu ba Hotel bainhira Timor assume prezidensia ASEAN.
Iha biban nee Prezidente Republika Jose Ramos Horta fo benvindu ba investor husi Xina neebe bele mai ona Timor Leste hodi haree prioridade saida mak sei halo investimentu iha Timor Leste, Prezidente mos husu investor sira bele haree saida mak investor sira bele halo iha Timor Leste liu-liu halo Hotel.
Prezidente Republika hatete, kona-ba atu halo investimentu iha Timor Leste, ida nee programa Governu nia, tanba nee husu investor sira bele koalia ho Governu nunee bele diskute klean liu tan planu no programa sira.
(eme)
