DILI, STLTIMORLESTE.com – Prezidente Republika (PR), Jose Ramos Horta lidera ensar bandeira ba fulan dahuluk Julhu nian iha Palasiu Prezidensial.
Prezidente Republika Jose Ramos Horta liu husi nia diskursu bainhira lidera serimonia ensar bandeira iha Palasiu Prezidensial Nicolau Lobato, Bairo Pite, Segunda (06/07/2026).
Nia hatete, eventu sira hanesan nee importante tebes.
“Serimonia nee importante diak ba ita nia kultura pratika maibe enkontru hanesan ita boot sira hamriik iha neeba hau iha nee hanesan fali parada militar ida, baibain nee iha mundu Xefe Estadu ka Xefe Governu koalia buat ruma mak parada maibe diak liu imi mai besik bele tuur mos bele,” dehan PR Horta.
Iha biba nee, Prezidente Republika hatete, se funsionariu iha Palasiu Prezidensial balun tama sai arbiru, Prezidente sei rekomenda ba Komisaun Funsaun Publika atu hamate kontratu.
PR hatete, tuir nia observasaun durante nee iha Palásiu Prezidensial iha finansa servisu diak, lojistika servisu diak no Kaza Militar mos servisu diak, maibe Prezidente Republika mos sei simu relatoriu husi Xefe Kaza Sivil ba Funsionariu sira neebe tama sai servisu.
Iha biban nee Prezidente mos husu funsionariu sira atu halo poupansa ba eletrisidade tama servisu bainhira sai tenke taka ahi eletrisidade nomos taka AC nunee bele halo poupansa.
Tuir observasaun neebe STL iha, serimonia nee hahu ho parada no kontinua ho ensar bandeira, hananu Ino Nasional Patria, Patria, remata hasae bandeira, Prezidente Republika hatoo um minutu silensiu hodi fo ondra ba Heroi sira neebe fakar raan hodi lori rai nee ba hetan ukun rasik aan, remata akompanha ho Hananu hanoin ba o nia belun neebe mate iha funu laran.
Partisipante sira neebe marka prezensa iha serimonia ensar bandeira husi Xefe Kasa Sivil, Adjunta Xefe Kasa Sivil, Xefe Kasa Militar, kargu Xefia sira nomos funsionariu Palasiu Prezidensial, no serimonia nee hahu iha oras tuku 08.00 no remata iha tuku 08.45.
(eme)
