DILI, STLTIMORLESTE.com – Prezidente Republika (PR), Jose Ramos Horta halo enkontru ho Judisiariu husi Brazil nomos Judisiariu Timor oan atu prepara ba konferensia internasional 4, kongresu konferensia internasional ho tema konaba “Direitu Humanu no Justisa”.
Bainhira remata hasoru malu, Ministru Justisa Sergio Hornai ba jornalista sira iha Palasiu Prezidensial Nicolau Lobato, Bairo Pite, Segunda nee (06/07/2026) hatete, ohin delegasaun boot ida mai husi Brazil, Republika Federativu Brazil nia mai husi Rio Janeiru, objetivu prinsipal ida mak atu halo konferensia internasional 4, kongresu konferensia internasional ida neebe harii liu ba iha tema sentral koalia konaba direitus humanus no justisa.
“Objetivu prinsipal ita atu aborda oinsa mak ita bele koalia konaba Estadu Direitu Demokratiku nomos ba iha Direitus Humanus, ita boot sira hatene muito bem katak tema nee tema universal, tema sentral ida neebe iha akademika sira barak ema neebe iha abilidade aas iha konhesidu iha mundu sira foti ida nee para bele halo sondajen ida konaba dinamika progresu sira neebe mak lao iha estadu ida nia,” dehan Ministru Justisa.
Ministru Justisa hatete, ohin hetan konvite espesial husi Prezidensia Republika nomos Governu liu husi Ministeriu Justisa halo parseria ida metin ho Embaixadora Timor Leste iha Brazil para halo koordenasaun ho Rio Janeiru no eskola judisiariu para kordena oinsa halo konferensia internasional hodi aborda liu-liu oinsa mak koalia konaba asesu justisa ba sidadaun sira neebe kbiit laek neebe bele asesu ba justisa hodi defende no garante sira nia direitu iha autoridade estadu ba direitu neebe pertense ba sira nia.
Ministru hatete, delegasaun husi Brazil nain neen ohin halo ona enkontru ho Prezidente no nain lima sei too mai tan nunee hola parte iha konferensia ida nee.
Konferensia ida nee mai atu fo bijibilidade ba sira atu haree liu tan kooperasaun sira ba oin troka hanoin balu oinsa mak sentru judisiariu Timor Leste nia liu liu sentru formasaun juridiku nia, nomos karik iha universidade sira neebe haree liu ba assuntu sira direitu humanus sira bele koalia liu tan situasaun balun iha materia area tematiku direitus humanus nomos ba iha Justisa nia.
Nunee mos Prezidente Republika Jose Ramos Horta hatutan, ohin halo enkontru ho setor judisiariu husi Brazil, nomos Jurista Timor oan sira oinsa halo preparasaun ba konferensia neebe sei mai.
“Iha loron sira mai nee enkontru boot setor judisiariu Timor ho Brazil delegasaun boot ida husi Tribunal, Jurista sira no tribunal Rio Janeiro nia neebe sira iha programa espesial ida ke baibain sira halo iha Brazil nee hanesan tribunal movel tanba Rio Janeiro mos sidade boot ida iha fatin barak ke difisil tebes para justisa too iha neeba, entaun sira organiza aan tuir lei instituisaun nee kria liu husi lei bolu justisa I movimentu, entau ekipa kompletu prokurador, advogado, Juis sira tama iha anguna ida sira ba bairu bairru neebe mak nunka asesu ba iha justisa, hanesan ita iha Timor Leste aldeia sira iha foho nee sira la hatene tribunal iha neebe, problema sira iha foho sira nee tenke lori too iha Suai, Baucau, nee mak hau konvida sira mai para fahe esperiensia sira nia ho ita nia tribunal sira ho Ministeriu Justisa, provedoria haree oinsa ita bele aprende buat ruma aplika iha Timor Leste,para lori justisa too aldeia sira,” katak PR Horta.
Tema ba konferensia nee mak konaba estadu Direitu nomos demokrasia, ou demokrasiak no estadu direitu, ida nee sei aborda prinsipiu jeral sei halo sub tema operajional iha area tematiko liu liu asesu ba justisa ba sidadaun hotu asesu ba justisa livre no demokratiku.
(eme)
