BAUCAU, STLTIMORLESTE.com – Institutu Nasional Seguransa Sosial (INSS) ho Banku Nasional Komersiu Timor Leste (BNCTL – sigla português) labele ba direita iha Suku Ossohuna no Afaloicai, iha Postu Administrativu Baguia, Munisipiu Baucau, hodi atribui subsidiu ba benefisiariu idozu no idoza sira iha suku refere.
Administrador Postu Administrativu Baguia, Mario Xavier da Silva informa, tuir kalendariu atribui subsidiu ba benefisiariu no benefisiaria sira husi Suku rua refere neebe INSS Baucau relata, atu realiza iha loron 07 Julhu nee, maibe too loron refere parte INSS neebe hamutuk ho BNCTL atu atribui subsidiu ba idozu no idoza sira la konsege, tanba parte INSS ho BNCTL labele marka prezensa direita iha Suku rua refere.
“Sira labele ba Suku Ossohuna no Afaloicai atu fo idozu idoza sira nia direitu tanba impaktu husi dalan,” hateten Mario Xavier da Silva ba STL iha Vila Nova Baucau, Kuarta (08/07/2026).
Nia komenta, mezmu parte INSS ho BNCTL labele marka prezensa dirieta iha Suku Ossohuna no Afaloicai hodi atribui subsidiu ba benefisiariu sira, maibe tuir informasaun neebe parte INSS relata, benefisiariu no benefisiaria sira lao ain husi Suku rua refere hodi simu sira nia direitu husi INSS neebe BNCTL realiza iha Suku Hae-Coni.
Nia sublina, mezmu INSS ho BNCTL inisia hikas atividade atribui subsidiu ba benefisiariu no benefisiaria sira realiza iha Suku Hae-Coni, maibe politika nee vale deit ba benefisiariu no benefisiaria neebe lao ain, enkuantu benefisiariu no benefisiaria sira neebe labele lao ain husi Suku Ossohuna no Afaloicai ba Suku Hae-Coni, labele simu sira nia direitu subsidiu refere.
“Sira la ba direita nee difikulta ba komunidade sira, liu liu sira neebe lao labele nee. Ita sei koordena ho INSS para haree segundu volta,” Mario akresenta.
Nia komenta, relasiona INSS ho BNCTL neebe labele marka prezensa iha Suku Ossohuna no Afaloicai atribui subsidiu dirieta ba benefisiariu sira neebe labele lao ain, parte Autoridade Postu Baguia koordena ona parte INSS atu kria orariu segundu volta nian ba Suku rua refere, nunee benefisiariu no benefisiaria sira bele simu sira nia direitu.
Liga asuntu nee, STL tenta konfirma koordendor INSS Munisipiu Baucau, maibe laiha fatin atu fo komentariu, tanba akompanha hela programa atribui subsidiu ba benefisiariu no benefisiaria sira iha Postu Administrativu Venilale.
(tom)
