DILI, STLTIMORLESTE.com – Antigu Deputadu husi Bankada Partidu Demokratika (PD) no Eis Membru Konelhu Estadu, Virgilio Hornai, fo sai katak komunikasaun entre lider sira husi Timor Leste (TL) no Indonezia sai hanesan save prinsipal ba evita konflitu sosial-politiku, no garante pas no estabilidade ba nasaun rua neebe partilha fronteira rai maran nee. Kestaun nee foka sai relasiona ho vizita kortezia Eis Prezidente Republika Indonezia, Megawati Soekarnoputri, neebe mai hodi hametin lasu amizade no fraternidade entre povu vizinhu rua nee.
Tuir Virgilio, relasaun informal entre Estadu Timor-Leste ho Indonezia sai hanesan sinal diak. Relasaun besik nee fo kontribuisaun boot ba manutensaun pas no estabilidade ba nasaun rua .
“Konflitu neebe mosu iha nasaun barak no kria instabilidade baibain akontese tanba falta komunikasaun husi lider sira. Bainhira falta meius komunikasaun, nia efeitu mak bele hamosu konflitu sosial no politiku entre nasaun,”dehan Virgilio ba STL iha ninia rezidensia, Díli, Kinta (09/07/2026).
Haree husi pontu de vista politiku, Eis Membru Konselhu Estadu nee dehan, relasaun kooperasaun entre Timor-Leste no Indonezia hatudu progresu neebe diak tebes, liuliu tanba Timor-Leste agora daudaun ba membru planu ASEAN nian.
Nunee vizita husi figura boot Indonezia nian hanesan Megawati nee, laos deit vizita baibain, maibe hanesan esforsu hodi fortifika relasaun amizade neebe eziste kkeur ona dezde Timor-Leste restaura ninia independensia, kria marjen relasaun ida neebe kondutivu liutan ba kooperasaun futuru, no garante estabilidade rejional neebe fo benefisiu mutua ba povu nasaun rua nian.
Tanba ho komunikasaun neebe diak no nakloke husi lider sira nasaun rua nian, sai hanesan xave prinsipal hodi prevene kualker instabilidade no kontinua lori dezenvolvimentu neebe pasifiku ba jerasaun foun sira.
Iha parte ketak, Observador Politika, José Manuel Sarmento, mos reforsa katak diplomasia informal no kultura vizita kortezia hanesan nee importante tebes, hodi hafasil negosiasaun formal sira iha futuru.
Tuir nia relasaun pas neebe estavel entre Timor-Leste ho Indonezia, sei sai ezemplu diak ba rejiaun Sudeste Aziatiku (ASEAN).
“Bainhira lider sira husi nasaun rua iha realasaun besik hodi rona malu, kualker problema iha fronteira ka dezafiu foun bele rezolve ho ulun malirin deit, labele hein too sai fali konflitu boot,”dehan Manuel.
Entretantu Akademista UNTL, Samuel Moreira, haktuir katak relasaun diak ho Indonezia laos deit kooperasaun politika, maibe fo mos impaktu boot ba dezenvolvimentu akademiku no ekonomiku. Tuir nia, estabilidade neebe eziste sei loke dalan liutan ba kbiit peskiza, interkambiu estudante, no kooperasaun siensia entre universidade sira iha nasaun rua.
“Estabilidade iha fronteira no relasaun amizade neebe metin fo garante ba dezenvolvimentu konhesimentu. Bainhira nasaun rua nee pas, dezenvolvimentu edukasaun ba joven sira mos bele lao ho susesu,” dehan Samuel.
(car)
