DILI, STLTIMORLESTE.com – Prezidente Republika (PR), Jose Ramos Horta simu delegasaun husi Universidade Sydney no delegasaun UNTL, hodi hametin parseria peskiza no edukasaun neebe vital.
Prezidente Republika, Jose Ramos Horta, simu delegasaun ida husi Sydney Southeast Asia Centre (SSEAC) husi Universidade Sydney no ekipa husi Universidade Nasional Timor-Lorosae (UNTL) ho objetivu oinsa hametuin parseria peskiza no edukasaun neebe vital.
Bainhira remata hasoru malu Adjunta Diretora ba Parseria sira iha SSEAC Sandra Alday ba Jornalista iha Palasiu Prezidensial Nicolau Lobato, Bairo Pite, Kuarta (08/07/2026) hatete, sente ondradu mai halo enkontru ho Prezidente Republika Jose Ramos hodi deskute hamutuk konaba parseria peskiza no edukasaun neebe vital.
“Hau ho delegasaun nomos kolega sira no estudante sira Universdidade Nasional Timor Leste UNTL, ami iha privilejiu tebes atu iha minutu balun atu hasoru malu sua exelensia Prezidente atu koalia konaba ami nia kolaborasaun ho Timor Leste inklui ho UNTL,” dehan nia.
Nia hatete kolaborasaun nee importante tebes. Parseiru lokal sira atu serbisu iha edukasaun oioin iha Timor Leste ba atividade peskiza sira.
Enkontru nee lidera husi Sandra Alday, Adjunta Diretora ba Parseria sira iha SSEAC, diskusaun sira nee foka ba inisiativa sira neebe iha impaktu boot, inklui servisu hosi projetu EPIC hamutuk ho Ministeriu Saude hodi elimina kankru serviks liu husi rastreiu no vasinasaun, nunee mos esforsu kooperativu sira hodi hadia dalan ba servisu ba sidadaun timoroan sira ho defisiensia no dezenvolvimentu estudu pas no konflitu nian.
Iha biban nee, Prezidente Republika Jose Ramos Horta espreza nia apoiu makaas ba kolaborasaun internasional sira nee, hodi nota sira-nia importansia iha harii nasaun ida neebe inkluzivu no reziliente liu tan.
Iha enkontru nee, delegasaun konvida ofisialmente Prezidente Ramos-Horta atu fo palestra publika ida iha Universidade Sidney, jestu ida neebe ho objetivu hodi hametin liu tan ligasaun intelektual no diplomatika entre Timor-Leste no instituisaun akademika prinsipal sira ho Australia.
(eme)
