BAUCAU, STLTIMORLESTE.com – Diresaun Nasional Prevensaun Konflitus Komunitaria (DNPCC – sigla português) Munisipiu Baucau, menus rekursu umanu.
Xefe Unidade Prevensaun Konflitus Komunitaria Munisipiu Baucau, Francisco Boavida da Costa aprezenta, inisiu tinan 2023 bainhira Governu deside estabelesimentu DNPCC no destaka funsionariu iha Munisipiu Baucau hamutuk nain 26 kompostu koordenador, mediador no pontu fokal koresponde ba Postu Administrativu 6, iha neebe kada Postu Administrativu hodi kumprimenta ba DNPCC nia vizaun, halo prevensaun ba konflitu sira neebe komunidade sira infrenta iha baze no tuir misaun hakbesik programa ba komunidade sira, nunee iha konsiensia prevene konflitus kontribui ba dezenvolvimentu nasional, maibe funsionariu neebe Governu destaka la sufisiente.
“Iha nee total funsionariu komesa reduz tanba balu ba kontinua fali nia eskola iha Dili, entuan transferensia ona ba Dili no balu hatama ona karta rezignasaun, rezigna aan ona,” informa Xefe Unidade Prevensaun Konflitus Komunitaria Munisipiu Baucau, Francisco Boavida da Costa ba STL iha nia knaar fatin Vila Nova Baucau, Kinta (09/07/2026).
Nia esplika, atual funsionariu neebe iha DNPCC Munisipiu Baucau hamutuk nain 18, la sufisiente atu kobre Postu Administrativu sira, tanba iha tinan liu ba Governu liu husi Ministeriu Administrasaun Estatal (MAE) aumenta ona Postu foun rua iha Baucau, atual Postu hamutuk 8, maibe haree ba total funsionariu refere la sufisiente, tanba DNPCC nia estrutura kuaze kobre hotu iha Postu 8 refere.
Nia sublina, tuir tarjetu no politika DNPCC nian kada Postu destaka funsionariu nain 3 kompostu koordenador, mediador no pontu fokal, maibe atual iha Postu Administrativu Vemasse, Baucau Vila no Laga laiha pontu fokal. Enkuantu Postu foun rua hanesan Postu Quelicai Antigu no Matebian, DNPCC seidauk estabelese nia estrutura Postu.
“Menus rekursu umanu nee fo impaktu ba DNPCC nia servisu, tanba DNPCC mos nia servisu importante liu, tanba bainhiria iha kazu sivil DNPCC mak ema primeiru hamriik iha oin halo mediasaun,” Francisco akresenta.
Nia komenta, DNPCC mos hola parte iha servisu linha frente atu halo mediasaun ba kazu sivil sira, maibe atual menus funsionariu bele fo impaktu ba pas no estabilidade, tanba bainhira kazu kiik hanesan kazu sivil la seriu atu foti medida urjente bele alastra ba kondisaun seluk hamosu ordem publiku.
Tanba nee parte DNPCC Munisipiu Baucau relata ona problema refere ba parte kompetente atu halo rekrutamentu funsionariu foun hodi koloka iha posizasaun no Postu rua neebe sei falta estrutura DNPCC, maibe seidauk hetan resposta husi parte relevante.
(tom)
