DILI, STLTIMORLESTE.com – Tribunal Judisial Primeira Instansia (TJPID) iha loron Kinta nee (09/07/2026) halao julgamentu ba arguidu ho inisial AMdRX hanesan laen, neebe komete krime hasoru lezada inisial MO hanesan feen iha Ermera.
Iha indisus sufisiente katak, iha loron 21 fulan Abril tinan 2025, lezada lori kafe mai faan iha Gleno, no osan neebe simu ofendida gasta ba sosa susubeen ba sira nia oan no ofendida lori fila deit US$ 9 ba uma.
Banhira too iha uma, arguidu foti fali osan restu neebe rai hela iha ofendida nia pasta hodi ba joga lakon tiha.
Ho nunee ofendida nervozu hodi mosu diskusaun, iha diskusaun nee arguidu nervozu lori liman basa ofendidu, dulas ofendida nia kakorok. No arguidu mos kaer katana ida iha liman atu tau ba ofendida nia kakorok maibe la konsege.
Konsekuensia husi arguidu nia hahalok nee halo ofendida sente moras hodi ikus mai ba hatoo keixa.
Tanba nee, Ministeriu Publiku akuza arguidu ho krime Arma Branka no Krime Violensia Domestika ho Forma Ofensa Integridade Fisika Simples.
Hatan ba akuzasaun nee arguidu deklara katak, momentu neeba arguidu foti duni osan iha lezada nia pasta no joga lakon iha merkadu, maibe osan nee foti lezada mos hatene.
Arguidu deklara tan, arguidu ba joga tanba lezada mak konta ba arguidu konaba mehi nia inan aman nia oin, tanba nee mak arguidu hanoin mehi hanesan nee matebian sira nia loron moris no loron mate bele sai iha SDSB, tanba nee mak arguidu simu osan iha lezada hodi ba sosa SDSB.
Arguidu deklara, osan neebe arguidu ba sosa SDSB hela restu $ 1.50 mak arguidu lori fila fali ba uma. Too iha uma lezada nervozu koalia barak, ho ida nee mak arguidu nervozu lori liman basa iha lezada nia hasan, no lezada foti katana ida mak arguidu ho lezada hadau malu katana nee, hodi arguidu buti iha lezada nia kakorok.
Arguidu deklara, katana nee lezada mak kaer uluk iha lezada nia liman, depois mak arguidu hadau fali. Depois akontese problema sira seidauk rezolve, labarik sira lao ba mai no arguidu mak tauk hodi la ba iha lezada sira nia uma.
Lezada mos reforsa tan katak, arguidu halo duni agresaun hasoru lezada.
Rona tiha arguidu no lezada, Tribunal husu atu submete ba iha alegasaun.
Iha alegasaun Prokurador Recardo Leite deklara katak, Krime Ofensas Integridade Fisika Simples husu Tribunal atu aplika pena multa loron 90 ho osan US$ 45, kuandu la selu, arguidu sei kumpri pena prizaun loron 30.
Konaba krime Armas Branka, MP husu Tribunal atu aplika pena prizaun tinan 2, suspende tinan 3.
Enkuantu husi parte defeza nian husu Tribunal atu kondena arguidu ho pena neebe justu.
Rona tiha alegasaun, Tribunal adia ba loron seluk hodi rona desizaun.
Audensia julgamentu nee prezide husi Juiz Koletivu, Ministeriu Publiku (MP) reprezenta husi Prokurador Ricardo Godinho Leite, arguidu hetan asistensia legal husi Defensor Publiku, Juvinal Dias.
(ter)
