DILI, STLTIMORLESTE.com – Ministeriu Ensinu Superior, Siensia no Kultura (MESSK) liu husi Unidade Parseria no Kooperasaun (UPK) ho Guangxi Normal University Republika Popular Xina haforsa relasaun kooperasaun liu-liu iha area ensinu superior, hodi promove dezenvolvimentu rekursu umanu no kapasidade institusional iha Timor Leste.
Iha Kinta nee (09/07/2026) Ministeriu Ensinu Superior, Siensia no Kultura (MESSK) liu husi UPK, simu delegasaun husi Guangxi Normal University Republika Popular Xina iha sala inkontru MESSK, Kolmera.
“Objetivu husi enkontru nee mak atu haforsa relasaun kooperasaun entre MESSK no Guangxi Normal University, liu-liu iha area ensinu superior, hodi promove dezenvolvimentu rekursu umanu no kapasidade institusional iha TL. Parte rua mos troka hanoin kona-ba oportunidade servisu hamutuk iha area turizmu, jestaun turizmu, enjenaria dezenu no peskiza sientífika,” haktuir pajina rede sosial MESSK.
Durante diskusaun nee, parte rua mos koalia kona-ba posibilidade asinatura akordu tekniku ida atu fasilita oportunidade bolsu estudu ba estudante timor-oan iha nivel mestradu no doutoramentu, liu husi programa iha area STEAM (siensia, teknologia, enjenaria, arte no matematika). Diskusaun refere mos fo atensaun espesial ba planu estabelese eskola superior otelaria o turizmu iha Munisipiu Lautem.
Ho Inisiativa ida nee espera bele kontribui ba dezenvolvimentu setor turizmu nasional liu husi formasaun profisional, peskiza aplikadu no dezenvolvimentu kompetensia rekursu umanu tuir nesesidade merkadu servisu.
Enkontru nee reflete kompromisu MESSK atu kontinua loke oportunidade kooperasaun internasional ho instituisaun ensinu superior prestijiadu sira, hodi hasae kualidade ensinu superior, peskiza sientífika no inovasaun iha TL.
Iha sorin seluk Graduadu UNTL, Mario Soares Lopes hatete, apresia ho kooperasaun governu nian aumesmu tempu MESSK nia kooperasaun bilateral ho nasaun seluk hodi loke tan bolsa estudu ba timoroan sira. Tanba bolsu estudu neemak oportunidade diak ba timoroan sira neebe hakarak kompete hodi kontinua sira nia nivel edukasaun. Atu desenvolve nasaun nee ho diak, presiza rekursu humanus neebe kualidade ho kualifikasaun husi area oioin.
(dom)
