DILI, STLTIMORLESTE.com – Prezidente Republika (PR), Jose Ramos Horta hatete, nia sei koalia ho Primeiru Ministru (PM) Kay Rala Xanana Gusmão atu retira proposta lei defamasaun.
Prezidente Republika, Jose Ramos Horta hatoo lia hirak nee ba jornalista sira iha Salaun Prokurador Jeral Republika Kolmera, Sesta nee (09/07/2026) hatete, nia kontra total atu halakon proposta lei defamasaun, tanba nee bainhira halo enkontru semanal ho Primeiru Ministru Kay Rala Xanana Gusmão, Prezidente sei husu PM atu fo intrusaun ba deputadu sira husi Bankada CNRT no PD nunee bele hasai tiha projetu lei neebe parlamentu rasik halo ona ajendamentu atu deskute nee.
Prezidente Republika hatete diak liu Governu no Parlamentu Nasional foka assuntu seluk liu liu konaba dezenvolvimentu ba ekonomia no seluk tan lalika preokupa ho lei defamasaun.
“Hau totalmente kontra lei defamasaun kinta feira mai hau sei koalia Primeiru Ministru Kay Rala Xanana Gusmao para PM fo instrusaun ba bankada CNRT, PD, hasai tiha projetu lei ba defemasaun nee ida ikus liu nee 2014 hasai hotu, liu liu konsentra ba buat neebe presiza ba ekonomia ba dezenvolvimentu rai nee, nee mak hau kontra,” dehan PR Horta.
Antes nee mos Prezidente Republika hatete ona, se bainhira Parlamentu Nasional obriga aan aproga lori ba Prezidente Republika sei la promulga.
Tanba nee Prezidente husu Parlamentu Nasional lalika lakon tempu koalia konaba projetu-lei kriminalizasaun defamasaun, Parlamentu sira lalika lakon tempu, tanba husi Timor-Leste liberade expresaun 100%.
Xefe Estadu hatete, nusa preokupa ho projetu lei kriminalizasaun defamasaun, diak- iu haree tau matan ba aselera investimentu projetu sira kria empregu ba povu. Lalika preokupa fali ho projetu lei kriminalizasaun defamasaun, tanba defamasaun nee laos mai d’it husi mídia, mai husi polítiku sira koalia tunsae iha Parlamentu Nasional. Dala barak polítiku sira halo akuzasaun oioin inklui kontra Primeiru-Ministru, Prezidente Republika nee defamasaun oioin maibe sira iha umanidade. Agora jornalista oan sira hakerek buat ruma nee labele iha imunidade, diakliu lalika preokupa ho ida nee.
Xefe Estadu rekomenda diak liu Timor nafatin liberdade imprensa 100%. Tanba ho mídia sosial atual iha mundu nee atu halo sees oinsa loos. Nee duni, Xefe Estadu lalika lakon tempu ho projetu-lei defamasaun.
Maibe dadaun nee Parlamentu Nasional mos halo ona ajendamentu ba diskusaun projetu lei defamasaun.
(eme)
