DILI, STLTIMORLESTE.com – Prezidente Republika (PR), Jose Ramos Horta husu parte hotu luta makaas hodi kontra jogu online ilegal no krime organizadu neebe tama iha Timor Leste.
Prezidente Republika Jose Ramos ba jornalista sira iha salaun Prokurador Jeral Republika Kolmera, Sesta nee (10/07/2026) husu atu nafatin luta makaas hodi kontra krime organizado no jogu online neebe dadaun nee tama iha Timor Leste, Prezidente husu bainhira kaer lori kedas ba Komarka labele husik iha liur (TIR).
“Prosesu sira nee klaru lao ho PSIK, PNTL, PJR, tribunal sira hau hatete mensajen politika mak hau bele hatete ita tenke luta makaas kontra boatomak sira nee, luta makaas hasoru krime organizado iha Timor Leste husi neebe deit la intrese tanba rai hotu iha ASEAN nee sira imfrenta krime organizado,” dehan PR Horta.
Prezidente Republika hatete, krime organiza koko atu tama rai hotu hotu, hanesan iha Amerika, Eropa iha, no sira hanoin katak Timor Leste fasil sira tama tanba rai kiik frazil, maibe ho rai kiik no frazil bele detekta lalais krime organizado sira nee.
“Luta makaas kontra sira laiha kompromisiu, ho kuidadu bainhira kaer sira labele husik para sira halai fali, mesmo viola karik lei ka saida, husik sira iha Bekora tinan ida ho deit desizaun tribunal adia adia laiha buat ida lahusik sira sai,” katak PR Horta.
Oinsa Prezidente nia haree liga ho kazu jogu illegal nomos krime organizado neebe kontinua iha tribunal leste nee failansu husi neebe? Hatan ba kestaun nee Prezidente hatete kontinua akontese nee laos tanba failansu ruma nee normal akontese tanba rai barak mos iha jogu illegal no krime organizado sira sei tama.
“Nee laos failansu ruma nee normal akontese tanba rai boot liu ita, esperensia boot liu ita hanesan Australia, ema ruma duvida tanba Australia nee professional efisiente, Australia federal Police nee hau koinese diak ba hau polisia ida top iha mundu diak liu mak (FATF) Finansial Action Task Force, sira mak luta kontra terismo, krime organizado, droga Money Laundering, sira apoiu ita maibe Australia nee haree krime organizado barak iha Melbourd, Sydney, laos fasil,” dehan PR Horta.
Xefe Estadu hatete, Timor Leste foin hahu maibe koko trava krime organizado no jogu illegal sira nee, se Timor halo buat ruma trastiku todan makaas sira bele hakfodak no lamai tan Timor Leste.
PR Horta hatete, krime organizado tama Timor Leste bele mos fasilita husi Timoroan tanba nee ekipa neebe luta ba kontra hanesan PNTL, PSIK, PJR, kolabora ho polisia ASEAN, no Australia nia para neneik bele trava.
“Hau fiar bele, hau komfiansa ke bele, tenke haree lei ruma foun para lei nee radikal liu signifika ema neebe tama iha nee akuzado krime organizado labele fo hanesan hela iha Uma (TIR) nee labele tenke ba kedas Bekora, julgamentu ka la julgamentu hein iha neeba tinan ida, ka tinan rua too julgamentu,” katak PR Horta.
“Nee laos hau profoin Governu no Parlamentu tenke haree nee hodi fo fleksibilidade, fasilidade ba polisia se ba prizaun 72 bele sai, juis hatete bele prolonga maibe bele detein too bainhira, tanba krime organizado o kaer ema ida la signifika ema nee nia mak responsavel ba rede central nia funsionariu ida ka laos Xefe nee duni o tenke ba kuidadu para hahu ho nia bele too Xefe sira nee, Xefe nee iha neebe bele iha rai seluk iha ASEAN,” katak Horta.
Iha biban nee Prezidente Republika husu ekipa neebe luta kontra terorismo no jogu illegal nafatin kopera malu nunee trava labele tan iha futuru Jogu illegal mai nakonu iha Timor Leste.
(eme)
