DILI, STLTIMORLESTE.com – Komunidade sira labele husik oan sira ba faan iha estrada, liu-liu iha fatin kruzamentu nian hanesan iha Timor Plaza no fatin sira ho movimentu trafiku neebe makaas.
Tuir Sidadaun Flavia Mendonca hatete, komunidade no inan aman sira atu labele husik oan sira ba faan sasan iha estrada ibun sira. Haree ba realidade neebe iha, labarik barak mak faan sasan iha estrada, liu-liu iha fatin kruzamentu nian hanesan iha Timor Plaza nian. Bainhira iha tempu loraik haree labarik barak mak halai korta ba mai, lori sira nia sasan fo ba ema sira ho kareta atu sosa, haree ba situasaun nee risku tebes. Tanba fatin sira nee ho movimentu trafiku neebe aas.
“Hau triste oituan bainhira haree labarik barak lori sira nia sasan ba faan iha estrada Timor Plaza nia oin, liu-liu iha parte loraik nian. Ita haree labarik barak mak hamrik iha fatin nee faan sira nia sasan. Bainhira haree kareta privadu sira, labarik sira nee idak-idak halai hodi husu ema atu sosa sira nia sasan. Dala ruma sira korta estrada kareta balun atu soke, haree ida nee halo ita tauk no triste ho sira nia situasaun,” dehan nia ba STL iha Komoro, Kinta (10/07/2026).
Nia hatutan, sekuandu inan aman no komunidade balun neebe husik hela oan sira nafatin ba faan sasan iha fatin nee, bele aumenta risku asesidente trafiku nian. Neebe se husu ba seguransa no parte relevante neebe tau matan ba labarik sira nian atu bele tau atensaun ba kestaun nee.
Nunee mos Komunidade neebe fan hahan tasak iha Timor Plaza oin, Rosalina da Cruz hatete, iha parte dader labarik sira ladun barak, karik tanba balun ba tiha eskola. Maibe tama ba loraik neemak sira komesa barak iha estrada ibun sira, tama to tiha estrada laran hodi husu ema sira ho kareta nee sosa sira nia sasan. Balun haree kareta ida husi estrada sorin nian, sira mos halai tesik ba hodi se sasan sira ba ema iha kareta laran atu sosa.
“Ita haree sira halai ba mai iha estrada laran nee, halo ita mak tauk fali kareta atu soke sira. Ema balun komprende halai neneik hodi hase fodik, mais balun la komprende halai atu soke no siak tan sira. Maibe sira nafatin, lor-loron mai faan iha estrada kruzamentu nian nee deit,” dehan nia.
Nia afirma, husu ba inan aman sira atu labele haruka oan sira mai faan sasan iha kruzamentu nian, tanba iha kruzamentu nian nee risku tebes.
Iha sorin seluk Instituto Defesa dos Direitos da Criança (INDDICA), iha dia 09 de Julu tinan nee lansa ona kuadru avizu dahuluk iha area Timor Plaza, ho mensajen forte ba komunidade sira katak “labele husik labarik faan sasan iha estrada.” Inisiativa nee atu sensibiliza ba publiku kona-ba perigu neebe labarik sira hasoru bainhira faan iha kruzamentu no fatin sira ho movimentu trafiku neebe aas.
Tuir Prezidente INDDICA, Dinorah Granadeiro, hateten, shili Timor Plaza nuudar fatin lansamentu dahuluk tanba loron-loron labarik barak kontinua faan sasan iha kruzamentu refere. Nia esplika katak maski dader balun sei ba eskola, hahu husi meudia too kalan labarik sira fila fali ba estrada atu faan sasan.
Kampaña ida nee laos deit atu instala kuadru avizu, maibe atu hamenus konsiensia publika no bolu inan-aman, família no komunidade atu la envolve labarik sira iha atividade ekonomia iha estrada. Tuir nia, labarik hotu-hotu iha direitu atu hetan edukasaun, protesaun no moris iha ambiente neebe seguru.
INDDICA espera kampana ida nee bele aumenta konsiensia publika no hamenus numeru labarik sira neebe faan sasan iha kruzamentu, liuliu iha area sira neebe movimentu trafiku aas hanesan Timor Plaza.
(dom)
