DILI, STLTIMORLESTE.com – Gruta Golgota Komoro sai nuudar fatin neebe sarani sira hodi buka hakmatek iha Maromak no kolia ho Nain Feto Maria, hodi hases aan husi atividade loron loron nian neebe nakonu ho barulhu iha sidade Díli. Liu husi vizita ba fatin sagrada nee, sarani sira koko atu atu hetan pas iha laran no renovasaun espiritual liu husi orasaun Nain Feto Maria.
Tuir observasaun jornalista STL, iha fatin neeba haree sarani sira vizita Gruta Golgota ho objetivu atu halo orasaun ho laran metin. Iha area laran no oin husi Gruta, bele haree grupu sarani sira neebe halibur an hodi kolia ka hasae orasaun ba Nain Feto Maria, buka kbiit espiritual, no refleta konaba sira nia moris.
Ambiente iha fatin nee sai furak liu tan ho prezensa aihun sira neebe fo mahon, ba sarani neebe tuur hodi halo meditasaun. Kadeira sira neebe preparadu ona iha oin mos fasilita sarani sira, atu bele tuur ho hakmatek durante orasaun.
Prezensa sarani sira nian iha fatin nee hatudu katak, maske sidade Díli sai sai movimentadu, fiar nafatin nuudar baze importante ida ba sarani sira, atu hetan renovasaun espiritual, no hakbesik an ba Nain Feto Maria iha sira nia orasaun.
Sarani ida, Albertina Soares, hateten katak vizita ba gruta nee fo ona kmaen boot ba nia.” Hau sente hakmatek tebes bainhira mai iha nee hodi kolia ka hasae orasaun ba Nain Feto Maria konaba hau nia moris. Fatin nee nuudar uma ida neebe fo kbiit mai hau atu enfrenta problema loron loron nian ho laran neebe kalma,” hatete Albertina ba STL, Sesta nee (10/07/2026).
Albertina mos fiar katak fatin orasaun nee bele mantein nia diak, atu nunee sarani sira seluk neebe hakarak mai buka hakmatek bele sente nafatin ambiente silensiu no sagradu neebe importante tebes ba sira nia kbiit espiritual.
Sarani seluk, Rogério da Costa, fo ninia esperensia katak fatin nee sai fatin neebe espesial tebes ba nia hodi entrega nia ksolok no susar sira ba Nain Feto Maria.” Iha nee hau sente hanesan vizita inan ida neebe prontu atu rona hau nia orasaun sira, no ida nee mak motiva tanba sa hau sempre hili atu mai Gruta nee,” dehan Rogério.
(car)
