DILI, STLTIMORLESTE.com – Bankada Partidu Kongresu Nasional Rekunstrusaun Timor (CNRT) iha Parlamentu Nasional husu Ministru Administrasaun Estatal (MAE) atu foti medida hasoru Prezidente Autoridade Munisipiu Aileu ho inisial JB, tanba la iha responsabilidade ba ninia aktu.
Tuir Xefe Bankada Partidu CNRT, Deputadu Patrocinio Fernandes katak, hanesan Prezidente Bankada Partidu CNRT iha Parlamentu Nasional lamenta tebes ho atetude PAM Aileu neebe utiliza poder no logo partidu nian hodi halo kontratu pesoal.
Tuir nia, atetude husi PAM Aileu nee laos reprezenta partidu iha Munisipiu Aileu, tanba doutrina husi Partidu CNRT seidauk hanorin estrutura no militante sira iha teritoriu laran atu uza poder hodi hatudu hahalok hanesan nee.
Nia dehan, Partidu CNRT sei la nonok no sei foti medida ba PAM Aileu tuir regras neebe mak partidu iha.
“Ita nuudar Prezidente Bankada reprezenta partidu ida neebe sai vitima ba hahalok ida hanesan nee, ami lamenta, maibe partidu iha nia mekanizmu no regra atu orienta no atu foti asaun sira ba kaudru sira nee,” hatete nia ba jornalista sira iha PN, Segunda (20/07/2026).
Nia hatutan, PAM Aileu hanesan kuadru partidu CNRT maibe atetude nia halo afeta ba naran diak ba partidu nian tomak, tan nee lideransa superior partidu nian pois sei halo xamada hodi haree.
“Ita iha prosesu tomak konstrusaun Estadu, katak buat hotu iha prosesu sira atu eduka malu, parte nee hanesan parte ida bolu atensaun ba malu oinsa orienta malu liu-liu iha ita-nia komportamentu sira iha ita nia vida loro-loron nian, inklui oinsa mak ita bele komporta bainhira ita iha organizasaun ida nia laran lidera hela liu-liu organizasaun Estadu nian,” dehan nia.
Entretantu tuir karta neebe STL asesu ho N/Ref.: 469/M-MAE/VII/2026, husi Ministru Administrasaun Estatal (MAE), Tomas Cabral husu ona ba Inspetor Jeral Administrasaun Estadu loke inkeritu ba Prezidente Autoridade Munisipiu Aileu relasiona ho kazu neebe nia hasoru.
“Hau hakarak hatete ba Vossa Excelensia katak, tuir faktu sira neebe imputa ba ita no neebe publika ona iha rede sosiais no orgaun komunikasaun sosial sira, hau determina ba Inspetor Jeral Administrasaun Estadu atu loke inkeritu ida, neebe sei konduz husi Gabinete Inspesaun-Jeral no Auditoria Administrasaun Estadu, ho objetivu atu halo apuramentu kompletu kona-ba verdade material relasiona ho alegasaun sira neebe temi ona,” haktuir karta nee.
Ministeriu Administrasaun Estadu halao nia knaar tuir respeitu tomak ba prinsipiu sira Estadu Direitu Demokratiku nian, liu-liu prinsipiu presunsaun inosensia, tanba nee, sei la propoin ka aplika medida sanksionatoria ruma molok remata prosedimentu inspesaun refere no halo apresiasaun ba nia konkluzaun sira.
Maski nunee, tanba akuzasaun sira nee hetan atensaun boot iha media, tantu iha redes sosiais no iha orgaun komunikasaun sosial sira, presiza atu foti medida kautelar sira hodi proteje dignidade, kredibilidade no prestijiu instituisaun publika sira.
Tanba kargu Prezidente Autoridade Munisipal reprezenta Governu iha area administrativu refere, tenke asegura katak funsionamentu normal Administrasaun Publika no konfiansa sidadaun sira ba instituisaun Estadu la hetan afeita durante prosesu inkeritu nee.
“Tanba nee, hau determina ba Vossa Excelencia katak, too inkeritu neebe lao hela remata no desizaun kona-ba inkeritu nee hetan komunikasaun ofisial, Vossa Excelencia tenke la marka prezensa iha instalasaun Autoridade Munisipal Aileu no la halo asaun ruma neebe relasiona ho ezersisiu kompetensia sira neebe inerente ba kargu Prezidente Autoridade Munisipal,” relata nota nee.
Durante periodu nee, kompetensia sira neebe presiza atu garante funsionamentu normal Autoridade Munisipal tenke halaoo husi Sekretariu Munisipal ida ka liu neebe Vossa Excelencia deside delega ba, tuir dispozisaun legal neebe aplika. Maibe mos MAE tenke foti medida hotu-hotu neebe nesesariu atu asegura kontinuidade atividade administrativu no promove nafatin interese publiku.
“Hau fiar katak Vossa Excelencia sei komprende katak determinasaun ida-nee la signifika julgamentu antesipadu ida kona-ba loos ka la loos akuzasaun sira neebe diriji ba Vossa Excelencia. Objetivu uniku husi medida ida nee maka atu proteje interese publiku, kredibilidade instituisaun Estadu sira no dignidade husi kargu neebe Vossa Excelencia daudaun okupa, durante prosesu apuramentu ba faktu sira neebe kompetente sei halao,” haktuir nota.
(alb)
