DILI, STLTIMORLESTE.com – Kompanhia Rayhana no Comodities X Change hetan ona lisensa husi Governu Timor Leste (TL) liu husi Ministeriu Agrikultura, Peska, Pekuaria no Floresta (MAPPF), atu kaer ikan iha Tasi Timor.
Konfiansa Governu ba kompanhia rua kaer ikan iha Tasi Timor realiza liu husi serimonia lansamentu ofisial entrega ba roo peska fibra vidru semi-industria halao iha aredor Unidade Polisia Maritima (UPM), Lecidere, Dili, Segunda (20/07/2026), prezensa husi Primeiru Ministru (PM) Kay Rala Xanana Gusmão.
Antes hahu serimonia lansamentu nee, PM Xanana tara tais ba bainaka VIP sira neebe hola parte iha serimonia lansamentu nee, inklui empreza nain rua neebe hetan lisensa husi Governu TL kaer ikan iha tasi Timor.
Liu husi diskursu PM Xanana hateten, Governu laos deit fo lisensa atu kaer ikan, maibe mos preokupa oinsa produtu peska sei distribui no transforma atu aumenta valor ekonomia no evita faan ikan fresku deit iha merkadu.
“Hau lakohi entrega deit buat hotu, hau nia preokupasaun mak tuir planu nee, roo sira sei ba kaer ikan kada semana rua. Karik lori ikan barak mai Dili, tenke iha planu atu prosesa no preparasaun ba merkadu,” PM Xanana hateten.
Iha biban nee, Ministru Agrikultura, Peska, Pekuaria no Floresta (MAPPF), Marcos da Cruz esplika, atribuisaun lisensa ba kompanhia lokal rua nee hatudu kompromisu Governu nian, atu fo oportunidade ba emprezariu nasional hodi partisipa diretamente iha dezenvolvimentu setor peska.
Ministru Marcos akresenta, TL iha linha kosteira naruk kilometru 735 no Zona Ekonomia Eskluziva ho luan kilometru kuadradu 72.000. Potensia rekursu peskas, atinje too 718.900 tonelada kada tinan, maibe durante nee foin esplora serka 2%, enkuantu parte boot seluk lakon tanba atividade peska ilegal.
Nia dehan, roo neebe lansa hamutuk haat, kompostu husi roo rua pertense ba Rayhana, ida ba Comodities X Change, Lda no ida pertense ba Governu.
Roo Governu nian sei uza atu monitoriza no kontrola atividade roo peska sira neebe simu lisensa no mos apoiu fiskalizasaun ba peskador sira.
Iha biban nee nain ba Kompanhia Rayhana, Ricardo Nheu sente kontente ho oportunidade neebe IX Governu Konstitusional fo ba emprezariu nasional atu investe iha seitor peska.
“Hau promete halao atividade ho responsabilidade no servisu hamutuk ho entidade relevante sira, atu evita difikuldade neebe bele mosu,” afirma nia.
Iha serimonia lansamentu nee, Governu mos entrega sertifikadu lisensa no ekipamentu GPS ba roo sira, atu fasilita monitorizasaun no kontrolu atividade peska.
(jos)
