DILI, STLTIMORLESTE.com – Merkadu Tais Colmera hanesan merkadu ida neebe mak prepara husi Governu iha Sidade Dili, ba maluk Timor oan sira husi munisipiu 13 inklui Rejiaun Administrativa Espesial Oecusse-Ambeno (RAEOA), hodi hatudu identidade Kultura Timor ba mundu, husu Timor oan sira hotu atu kontinua valoriza.
“Produtu neebe mak ami faan iha merkadu kultura Colmera nee, hanesan promove tais no ekipamentus tradisionais Timor nian neebe mak ita nia viza avo too avo sira uza iha tempu neeba, mak daudaun ami promove, atu valoriza ita nia kultura Timor nian, tanba nee husu ba jerasaun foun sira, maske ohin loron produtu imitasaun oi-oin deit mak.komesa domina merkadu iha TL, maibe husu atu nafatin utiliza produtu kultura Timor nian neebe homan no soru husi ita nia maluk Timor oan sira neebe lori mai faan iha merkadu tradisional ida nee, tanba nee labele husik ita nia kultura nee lakon,” dehan Pedro Fernandes de Araujo nuudar Negosiante merkadu tradisional Colmera ba STL iha ninia fatin negosiu, Segunda (20/07/2026).
Nia dehan, sasan neebe mak sira faan iha merkadu tradisional Colmera mak tais feto, tais mane, neebe uza ba lia moris no lia mate, homan oi-oin uza sasan orijinal Timor nian, alende nee mos pasta modelu oi-oin husi kiik too boot neebe halo ho tais Timor, nain faan iha nee ho folin fariavel, iha mos mortel, kaebauk ho estatua tradisional neebe halo husi katuas arte zenatu tradisionais sira iha tempu neeba, kontinua konserva no promove ba maluk sira neebe presiza tau iha fatin turistiku sira, restaurante ho hotel, atrai ema haree identidade Timor nian ho sasan kultura sira nee.
“Ami nia rendimentu depende ba situasaun deit, dala ruma loron ida bele hetan osan too US$ 25.00 ba leten, dala ruma mos la hetan, maibe ami nafatin faan iha fatin ida nee hodi promove kultura Timor nian ba mundu, dala ruma governu lori turista sira husi rai liur, sempre mai kompra sasan iha nee, kuandu sira mai osan hetan maibe depende sorte deit,” dehan nia.
Iha biban nee, nia fo lia menon ba jerasaun foun sira tenke banati identidade neebe mak prepara iha merkadu tradisional ida nee, labele husik tradisaun ka identidade Timor ho hatais kultura sira nee lakon.
Iha biban nee Maria Soares dehan, hanesan feto klosan ida neebe sei eskola, maibe loron-loron sempre gasta tempu ba fatin negosiu tais Timor nomos loron-loron la husik tempu hodi halimar, maibe aprende homan no soru tais atu faan hodi hetan osan sustenta ekonomia uma laran.
“Hau hanesan estudante oan ida, loron-loron kuandu sai ona husi eskola sempre fo tempu tomak mai faan produtu lokal Timor nian neebe hau nia inan aman hetan fatin iha merkadu tradisional nee hodi faan buka osan eskola no sempre aprende homan no soru tais iha merkadu nee, duke kaer telefone la iha benefisiu, tanba gasta osan loron-loron hodi sosa pulsa,” dehan nia.
Iha biban nee, Veronica das Dores nuudar komprador.agradese ba Governu Timor Leste neebe prepara merkadu tradisional Timor nian iha Colmera, lia kona sempre sosa tais mane no tais feto halo lia iha foho.
“Hau kontente teb-tebes ba governu, tanba bele kria fatin ida iha Colmera hodi faan produtu tradisional Timor nian, espera ba oin governu mos kria merkadu tradisional ida hodi faan deit produtu ai-haan tradisional deit, atu nunee atrai turista lokal no estranjeiru bele konsumu mos produtu lokal Timor nian neebe husik nanis iha tempu pasadu,” dehan nia.
Tuir observasaun STL iha merkadu Tradisional Colmera, negosiante idak-idak tuur iha ninia baraka oin hodi konversa, bainhira ema tama iha merkadu tradisional nee hodi sosa produtu tradisional neebe mama maluk negosiante sira faan iha merkadu refere.
(jos)
