DILI, STLTIMORLESTE.com – Prezidente Republika (PR), Jose Ramos Horta hatete, Timor Leste (TL) ho Xina nia relasaun metin antes prezensa Português iha Timor Leste.
Prezidente Republika Jose Ramos Horta hatoo kestaun nee liu husi nia diskursu iha Likisa, Segunda (20/07/2027) hatete, lasu istoriku neebe kleur tebes entre Timor Leste no Xina, hodi nota katak komersiante xines sira too iha Timor dezde tinan 1400 aan sira, antes prezensa Português.
“Xina nasaun ida relasaun metin ho Timor Leste, istoria Timor ho Xina laos foin hahu iha 2002, hahu kedas iha 1400 komersiante Xines sira mai Timor antes Portugal too iha nee, antes Portugal too iha nee 1400 nunee, Komunidade Timor Leste Xina mos kleur los iha nee balun partisipa iha luta libertasaun Indepedensia, balun sofre terus, lakon buat hotu durante tempu luta la lori sira nia osan ba rai seluk, sira investe iha nee balun mate iha nee, kiak, balun kontribui makaas ba Timor Leste nia ekonomia,” dehan Prezidente Republika.
Prezidente Republika hatete, ba komunidade Timorense Xina, Prezidente rasik konhese sira lubuk ida desde sei kiik hamutuk iha Atsabe, Laga, no fatin seluk tan.
“Iha Atsabe, Laga Baucau no fatin seluk sempre haree komunidade Timorense Xina mak buka loke loza ruma, sosa ema nia kafee husi Atsabe Ermera mai Dili ba merkadu Internasional sira, la halo karik kafee nein ita exporta ba sira ita buka simu sira ho diak,” katak PR Horta.
Xefe Estadu hatoo omenajen ba kontribuisaun tempu naruk husi komunidade xines timoroan sira, liu liu sira nia sakrifísiu durante luta ba ukun rasik aan no sira nia papel kontínuu iha dezenvolvimentu ekonomiku nasaun nian, inklui iha setor vital sira hanesan komersiu kafe.
Prezidente mos enkoraja parseria kontínua entre emprezariu timoroan sira no investidor internasional sira husi rai oioin, hodi enfatiza katak kolaborasaun sira nee krusial tebes atu avansa progresu nasaun nian.
Prezidente Republika hatutan tan katak, ho Fabrika Sentral Produsaun Betaun iha Timor-Leste (TL) neebe kaer husi Kompanha Xineza sei promove diversifikasaun ekonomia, no hamenus importasaun no promove Fabrikasaun lokal.
Prezidente Republika, Ramos hatete, Fabrika Sentral Produsaun Betaun iha Likisa hodi konsidera fasilidade foun nee nuudar pasu importante ida hodi atinji autosufisiensia no diversifikasaun ekonomika Timor-Leste nian.
Xefe Estadu hatete, Importansia husi projetu nee atu hamenus importasaun, promove fabrikasaun lokal, kria oportunidade servisu, no avaansa formasaun teknika profisional ba sidadaun timoroan sira.
(eme)
