MAUBISSE, STLTIMORLESTE.com – Liu husi atividades negosiu neebe mak halo iha merkadu Maubessi, bele suporta oan nian eskola.
Lia hirak nee hatoo husi negosiante, Lidia Menezes, iha merkadu Maubessi ba STL iha merkadu Maubessi, Tersa nee (21/07/2026).
“Ami laos foin halo atividades negosiu iha merkadu ida nee, maibe dezde iha tinan 2017 too ohin loron ami nafatin halo negosiu, hodi bele suporta ami nian oan sira ba eskola, neebe mak balun remata ona iha ensinu superior, sekundariu, maibe nain rua mak daudaun nee sei sekundariu, rua nee ida remata ona iha universidade, ida seluk remata sekundariu, no agora kontinua hela iha UNPAZ,” katak nia.
Lidia dehan, maske inan aman la eskola too hanesan ho oan sira, maibe oinsa oan sira nian futuru nee tenke diak, mak liu husi dalan asesu ba iha eskola, nee duni rendimentu neebe mak kada loron sira hetan nee tenke rai hamutuk para bele selu oan nian eskola, oan tenke asesu ba iha edukasaun, maske inan aman halo deit negosiu ho rendimentu kada loron sira hetan.
“Rendimentu nee depende ba konsumidor sira mai sosa, dala ruma ami hetan US$ 40 resin, nee depende ema neebe mak mai sosa, tanba produtu neebe ami faan sosa tutan husi ema seluk, laos ami mak kuda rasik, lae. Ami faan hanesan modo mutin, lakeru mutin, repoilu, koto nurak, senhora, salada, koto, lis mean no mutin, fehuk ropa, batar, fehuk, talas no seluk tan, ami loron-loron tenke iha nee deit,” nia informa.
Nia informa, Sabadu ho Domingu nee ema barak mak halo viajen, nunee balun sosa modo neebe mak sira faan, osan nee balun selu labarik sira nian eskola, balun uza ba nesesidade uma laran nian, bainhira eskola feriadu nee labarik sira ajuda sira nian inan aman hodi halo negosiu iha merkadu, too tama fali eskola nee sira ba ona, tanba nee oan sira tenke eskola, liu husi rendimentu natoon neebe kada loron hetan, nee rai hamutuk hodi selu labarik sira nian eskola.
“Ami faan koto nurak nee dolar ida, lakeru mutin mos hanesan dolar ida, senhora, modo mutin mos hanesan, nee duni ninia presu nee kuaze atu hanesan, ami hetan oituan deit, merkadu nee sei hadia hela, ita nian negosiante balun faan sasan iha liur ou loron manas laran deit, balun uza halo netik mahon para bele faan sasan,” nia deklara.
(jac)
