DILI, STLTIMORLESTE.com – Ministru Joventude, Desportu, Arte no Kultura, (MJDAK), Nelio Isaac Sarmento hasoru Boxista Timoroan nain 6 iha Salaun MJDAK Lecidere, Dili, iha loron Tersa nee (21/07/2026) antes sira ba kompete iha Holywings Sport Show (HSS) Volume 10 iha Bali, Indonezia, neebe sei compete iha loron 26 /07/2026.
Ministru Joventude, Desportu, Arte no Kultura, (MJDAK), Nelio Isaac Sarmento iha sorumutu nee ba jornalista sira dehan, apresia ho boxista Timor oan lubuk ida maka komesa partisipa iha jogu professional boxing iha Bali-Indonezia.
“Ita hotu hatene katak, iha semana nee, iha eventu boxing internasional maibe maibe laos akontese iha Timor, maibe ita sei iha reprezentasaun joven lubuk ida, Boxista Timoroan lubuk ida maka komesa atu partisipa iha jogu profesional boxing nian iha Bali, eventu ida nee ita bolu naran HSS neebe Indonezia maka promove no sai uma-nain ba kompestisaun nee, ida nee boxista Profisional Indonezia nian ho Boxista TL nian. Timor Leste (TL) lori boxista nain 6 neebe iha klase diferente atu ba kompete mos ho boxista Indonezia nian 6 iha Bali-Indonezia, iha loron 26 Julhu tinan nee,” Ministru Nelio Isaac Sarmento ba jornalista sira iha salaun Magna MJDAK Lecidere Dili, Tersa (21/06/2026).
Governante nee hatutan, partisipasaun Boxita Timor oan iha neeba, atu prepara Boxista Timor oan nia, hetan esperiensia no hatudu sira nia kapasidade iha arena boxing internasional. Kompetisaun ida nee, atleta sira bele prova sira nia prestasaun, aumenta konfiansa no promove naran TL iha desportu boxing.
“Ita espera katak, ho partisipasaun Boxista Timor oan iha neeba, laos deit oinsa ita hakarak manan, maibe ita hakarak aprende ho boxista sira seluk, inklui ho ita nia promotor lokal sira, promotor Timor nian ita mos bele aprende kona ba realizasaun eventu profisional sira iha nasaun sira hanesan Indonezia,” Afirma Ministru Nelio.
Nia dehan, bainhira delegasaun fila husi Bali, Governu TL sei hamutuk ho Federasaun Boxing Amadora no promotor boxing lokal sira, atu avalia no prepara eventu boxing profesional ida iha TL.
Tuir Boxista Profesional TL, Delio Anzaqueci Mouzinho neebe sei disputa sintu Oriental and Pacific Boxing Federation (OPBF) hasoru Saroha Lumbantobing iha eventu nee katak, nia prepara aan ona ho diak atu hasoru nia adversariu iha loron 26/07/2026.
Boxista nee hatutan, hakarak hatudu prestasaun diak no realiza esperansa neebe povu TL no ekipa tomak iha ba nia. Segundu nia, iha desportu boxing manan, lakon no empate mak sai parte husi kompetisaun, maibe rezultadu diak depende ba preparasaun, esforsu, disiplina no servisu makaas durante treinamentu.
“Hau perparadu, hau sei hatudu hau nia jogu diak iha loron 26/7/2026 nee, espera katak buat neebe ita hakarak nomos povu TL hakarak, sei sai realidade,” dehan Delio Anzaqueci Mouzinho.
Iha biban nee, Promotor Revolta Combat, Xander Serano hatete, atleta sira hanesan Delio, Daniel no atleta seluk, sira halo promotor internasional aumenta interese atu konvida atleta Timor oan ba eventu sira tuir mai.
Nia dehan, boxing profesional, laos deit rezultadu manan ka lakon, maibe mak importante, maibe mos kapasidade atu hatudu luta neebe atrativu no bele dada atensaun espetador sira.
(jos)
