DILI, STLTIMORLESTE.com – Prezidente Republika (PR), Jose Ramos Horta halo enkontru ho madre sira husi kongregasaun Salesiana FMA, hodi diskute hamutuk tau matan ba joven feto sira neebe sei hela iha Dormitoriu neebe sei halao iha Palasiu Prezidensial sorin.
Bainhira remata enkontru, Madre Provinsial TL no Indonezia, Madre Evangelina Xavier FMA ba jornalista sira iha Palasiu Prezidensial Nicolau Lobato, Bairo Pite, Kuarta (22/07/2026) hatoo agradese ba Prezidente Republika Jose Ramos Horta neebe bele rona sira nia hanoin konaba tau matan ba labarik sira neebe sei hela iha Dormitoriu neebe sei harii iha Palasiu Prezidensial sorin.
“Uluk knanain agradese ba sua exelensia senhor Prezidente Republika Jose Ramos Horta neebe fo tempu ba ami hodi rona ami iha dader kmanek ida nee tanba ami mai kontinua ami rona prosesu rezidensia ba labarik feto sira nia edukasaun formal no informal sira neebe sei halao iha Palasiu Prezidensia sorin iha rezidensia ida nee,” dehan Madre.
Madre dehan, sira nia asistensia iha kolejiu atu eduka sira sai nuudar feto lo-loos, edukasaun integral ba sira.
“Ami nia prezensa iha sira nia leet nuudar inan no bin atu tulun sira atu bele realiza sira nia mehi iha futuru neebe diak liu tan atu sai sarani neebe diak, sidadaun neebe honestu ba Ita nia rai doben Timor Leste,” dehan Madre.
Madre dehan, Governu haree madre sira nia servisu diak, tanba nee bainhira harii Dormitoriu ba feto nee realiza madre sira mak sei tau matan iha tinan ida ka rua, tanba nee agora madre sira sei iha prosesu aprezenta kontratu ho Governu.
“Sei estuda hela kontratu neebe ami hatama, Governu sei haree buat neebe diak no buat neebe presiza atu hadia, ami prontu atu hadia,” katak Madre.
Madre hatoo mensajen ba foinsae neebe hela iha dormitoriu neebe sei iha Palasiu Prezidensial nee atu asesu buat neebe Governu fo ba sira ho diak, tanba sira mak nasaun nia ema, tanba nee aproveita didiak no sira nia susesu hanesan mos madre sira nia susesu no nasaun nia susesu.
Nunee mos Madre Julia Fernandes FMA hatete, kongregasaun Salesiana iha nia regra rasik. Tanba bainhira Estadu kolabora ho madre hodi tau matan ba Joven sira Iha dormitoriu nee sira regra rasik.
“Kriteria mak importante sira Iha hakarak hela Iha fatin ida nee no hetan akompanhamentu husi ami tuir ami nia sistema, ami Salesiana joven Feto Iha neebe ami Iha neeba,” katak Madre.
Nunee mos Madre Maria Anjelita FMA iha esperansa katak, ho joven feto sira neebe sei hela Iha dormitoriu neebe harii Iha Palasiu Prezidensia bele sai feto neebe matenek kualidade hodi kontribui ba rai ida nee.
“Ida nee tulun mos promosaun feto sira nia ho sentru neebe harii laos deit ho sira nia intelektual, maibe forma sira sai ema neebe kualidade ba sira nia moris rasik nuudar sarani ema neebe diak ba nasaun,” katak Madre.
Madre husu estudante Feto neebe sei hela iha dormitoriu nee aproveita ho diak ba sira nia futuru rasik.
“Ami forma ema laos deit intelektual maibe mos ema integral ,” katak Madre.
Aleinde nee Prezidente Republika Jose Ramos Horta, Primeiru Ministru Kay Rala Xanana Gusmao lansa ona fatuk dahuluk ba konstrusaun dormitoriu feto iha area Palasiu Prezidensial Lobato.
Projetu nee hetan apoiu finansiamentu husi Governu Emiradus Arabes Unidus (UAE).
(eme)
