DILI, STLTIMORLESTE.com – Hafoin horiseik asegura sidadaun Xineza nain 21, no loron Kuarta nee (22/07/2026) Komando Polísia Nasionál Timor Leste (PNTL) Munisipiu Dili liu husi Eskuadra Cristo Rei hamutuk ho Servisu Migrasaun nomos Diresaun Servisu Informasaun Polísia (DSIP) inklui Junta Forsa Polisia, asegura tan sidadaun estranjeiru Xineza nain 11 neebe deskonfia envolve iha atividade Scam Call Center.
Observasaun STL asesu katak, Kuarta loraik (22/07/2026) Komando PNTL Munisipiu Dili liu husi Eskuadra Cristo Rei hamutuk Servisu Migrasaun nomos Diresaun Servisu Informasaun Polísia (DSIP) inklui Junta Forsa Polisia konsege sobu rede boot ida nee, tanba deskonfia iha atividade Scam Call Center neebe lokaliza iha Suku Hera, Postu Administrativu Cristo Rei, Munisipiu Dili.
Entretantu ekipa mos prende evidensia sasan eletróniku barak, inklui utiliza teknolojia avansada hodi halo operasaun refere. Hafoin desmantela fatin refere, ekipa servisu halo kedas identifikasaun ba ema nain 11 hodi submete ba prosesu investigasaun, depois sei prosesu ba Ministeriu Publiku (MP) hodi prosesa tuir lei.
Entretantu atu hametin seguransa no kombate krime organizadu iha Timor Leste (TL), Governu liu husi Ministeriu Interior apela nafatin ba komunidade sira wainhira haree ka deskonfia atividade ilegal nee iha suku laran bele fo informasaun ba Autoridade Seguransa neebe besik.
(jen)
