DILI, STLTIMORLESTE.com – Primeiru Ministru (PM), Kay Rala Xanana Gusmão liu husi despaisu N.º 10/PM/VII/2026 nomeia Jacinto Ribeiro Dias nuudar Prezidente Autoridade Munisipiu (PAM) Aileu hodi troka João Bosco dos Santos.
Nomeiasaun nee bazeia ba karta husi Ministru Administrasaun Estatal (MAE), liu husi karta ho referensia 183/M-MAE/VII/2026, loron 22 Jullu 2026, propoin Jacinto Ribeiro Dias atu okupa kargu hanesan PAM Aileu foun.
Tanba konsidera katak perfil pesoal no profisionál kandidatu neebe MAE propoin nee adekuadu ho natureza, responsabilidade no ejijensia kargu no funsaun sira neebe sei halao, no mos ho objetivu Governu nian ba Autoridade Munisipal sira.
Tan nee tuir razaun sira neebe temi ona, Primeiru-Ministru deside, Exonera, ho efeitu imediatu, tuir n.º 1 artigu 21.º husi Dekretu-Lei n.º 3/2016, loron 16 Marsu, ho redação husi Dekretu-Lei n.º 34/2026, loron 15 Outubru, João Bosco dos Santos husi kargu hanesan PAM Aileu no nomeia fali PAM Aileu foun.
“Nomeia, ho efeitu imediatu, tuir n.º 1 artigu 21.º husi Dekretu-Lei n.º 3/2016, loron 16 Marsu, ho redasaun husi Dekretu-Lei n.º 34/2026, loron 15 Outubru, Senhor Jacinto Ribeiro Dias atu halao kargu hanesan Prezidente Autoridade Munisipal Aileu, hahu husi loron tomada de posse tuir dispozisaun legal sira,” tuir dokumentu neebe STL asesu husi Jornal Republika, Kuarta (22/7/2026).
Autoridade Munisipal Aileu mak ema koletivu ida iha direitu públiku, neebe iha autonomia administrativa, autonomia finanseira luan no patrimóniu rasik, neebé hela iha superintendénsia no tutela MAE nian, no regula tuir Estatutu Autoridade Munisipál sira no Grupu Tékniku Interministeriál ba Desentralizasaun Administrativa, ne’ebé aprova husi Dekretu-Lei n.º 3/2016, loron 16 Marsu, ho alterasaun ne’ebé hatama husi Dekretu-Lei n.º 34/2025, loron 15 Outubru.
Tanba PAM mak reprezentante Governu nian iha munisípiu ida-idak, no nia mak responsável atu dirije órgaun no servisu sira Autoridade Munisipál nian, asegura koordenasaun servisu administrasaun lokal Estadu nian neebe halao atividade iha munisípiu, no responde ba nia atividade sira ba entidade tutela, hanesan MAE, tuir artigu 20.º husi Dekretu-Lei n.º 3/2016, loron 16 Marsu.
Tan nee, MAE ho posibilidade atu delega kompetensia, atu organiza lalais liu serimonia tomada de posse ba PAM neebe foin nomeadu, tuir n.º 1 artigu 23.º husi Dekretu-Lei n.º 3/2016, loron 16 Marsu, ho redasaun atual.
Aleinde nee, MAE mos presiza fo konesimentu kona-ba despachu ida-nee ba Komisaun Funsaun Publika (KFP), atu kumpre formalidade legal no regulamentar sira neebe presiza.
(mik)
